Fjórir vildu leigja skip í togararallið

Auk rannsóknaskipanna Árna Friðrikssonar og Bjarna Sæmundssonar taka togararnir Gnúpur GK og Múlaberg SI þátt í togararalli. Áætlað er að það hefjist 27. febrúar og taki um þrjár vikur.

Togararall er einnig kallað marsrall, en ber formlega heitið stofnmæling botnfiska á Íslandsmiðum (SMB) og hófst 1985.

Gnúpur er eitt af skipum Þorbjarnarins í Grindavík, en Rammi í Fjallabyggð gerir Múlabergið út. Skipin voru valin að loknu útboði sem Ríkiskaup önnuðust fyrir Hafrannsóknastofnun. Fram kemur í auglýsingu að leiga á skipunum verði greidd með aflamarki. Fjögur fyrirtæki buðu í togararallið í ár.

Ljósafellið 26 sinnum

Múlabergið er einn af Japanstogurunum svokölluðu, sem komu til landsins í byrjun áttunda áratugarins. Áður var verkefnið sniðið að Japanstogurunum, en breyting hefur orðið á því síðustu ár. Ljósafellið SU frá Fáskrúðsfirði hefur í fjölda ára tekið þátt í togaralli, í fyrsta skipti 1986 og síðast í fyrra, alls 26 sinnum.