Þéttar og allstórar loðnutorfur voru mældar á afmörkuðu svæði suður og suðvestur af Papey á sunnudaginn. Birkir Bárðarson, fiskifræðingur á Hafrannsóknastofnun, segir að unnið sé að úrvinnslu gagna og reiknar með að þeirri vinnu ljúki í kvöld eða á morgun. „Við þurfum að átta okkur á því hversu mikið magn er þarna á ferðinni og hvort þetta er viðbót við það sem áður hefur verið mælt en við getum spáð í framhaldið,“ sagði Birkir.

Það voru skipverjar á Bjarna Ólafssyni AK, sem urðu varir við torfurnar á laugardaginn. Í kjölfarið var ákveðið að Börkur NK, Hákon EA og grænlenska skipið Polar Amaroq færu til mælinga og var farið yfir svæðið á sunnudag samkvæmt leitarlínum frá Hafrannsóknastofnun.

Í loðnumælingum rannsóknarskipsins Árna Friðrikssonar og fimm uppsjávarveiðiskipa í síðustu viku mældist minna af hrygningarloðnu samkvæmt fyrstu útreikningum heldur en í mælingu í byrjun febrúar. Í frétt frá Hafrannsóknastofnun síðasta föstudag kom fram að hverfandi líkur væru á að niðurstaðan breyttist verulega hér eftir.

„Þetta voru flottar lóðningar hérna vestur af Papey,“ segir Hálfdán Hálfdánsson, skipstjóri á Berki NK, um loðnumælinguna á sunnudaginn í samtali við Eyjafréttir í dag. „Ég geri mér enga grein fyrir því hvort þetta er nóg magn til að gefa tilefni til einhverrar bjartsýni. Svo vitum við ekkert hvort þetta er eitthvað sem er búið að mæla áður.“

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir

• Blogga um frétt