Samherji með yfirtökuskyldu í Eimskipum

Félagið Samherji Holding ehf., systurfélag Samherja hf., hefur aukið hlut sinn í Eimskipafélagi Íslands hf. um 3,05%, í 30,11%. Samherji mun innan fjögurra vikna gera öðrum hluthöfum tilboð svo sem lög áskilja.

Þetta kemur fram í tilkynningu sem Eimskip hafa sent kauphöllinni, en yfirtökuskylda myndast í kjölfar kaupanna.

Tilgangur Samherja með þessum auknu hlutafjárkaupum er sagður fyrst og fremst að sýna þá trú sem félagið hafi á rekstri Eimskipa, þeim árangri sem náðst hafi að undaförnu og eigi eftir að koma betur í ljós á næstu misserum.  

Eftirfarandi er haft eftir Björgólfi Jóhannssyni, forstjóra Samherja:

„Eimskip er allt að einu í meirihlutaeigu íslenskra lífeyrissjóða sem saman eiga rúmlega helming hlutafjár. Er það skilningur minn að stjórn Eimskips og stjórnendur hafi verið einhuga um þær miklu breytingar sem gerðar hafa verið á rekstrinum. Samherji telur Eimskip vel til þess fallið að vera áfram skráð í kauphöll og vonar að sem flestir hluthafar, stórir og smáir, sjái hag sínum best borgið með því að styðja áfram við þá uppbyggingu og fylgi félaginu um ókomin ár.“

• Blogga um frétt