Leggja til 20% aukningu í leyfilegu eldismagni
Hafrannsóknastofnun ráðleggur í samræmi við uppfært áhættumat að eldismagn verði ekki meira en 106.500 tonn á landinu öllu sem er aukning frá fyrra mati sem gerði ráð fyrir að hámarksframleiðslumagn fiskeldis yrði 71 þúsund tonn. Kom þetta fram á fundi stofnunarinnar í morgun þar sem Ragnar Jóhannsson, sviðsstjóri fiskeldissviðs, kynnti nýtt áhættumat á erfðablöndun og ráðleggingar stofnunarinnar.
Sagði Ragnar raunverulega aukningu vera 20% þar sem fyrra mat miðaði við framleiðslu en hið nýja miði við hámarkslífmassa samkvæmt áhættumati erfðablöndunar. Benti hann á að sé fyrra áhættumat endurreiknað á grundvelli nýjustu aðferð myndi fyrri ráðgjöf nema 88,75 þúsund tonn. Það er að segja að það þurfi 88,75 þúsund tonn í sjó til þess að framleiða 71 þúsund tonn.
Aukning á Vestfjörðum
Heildarmagn sem leyfilegt er að framleiða á Vestfjörðum verður samkvæmt ráðgjöfinni 61.500 tonn en fyrri ráðlagning nam 50 þúsund tonnum.
Stofnunin leggur til að hámarkslífmassi í Önundarfirði fari úr engu í 2.500 tonn og í Ísafjarðardjúpi úr engu í 12 þúsund tonn. Þá er óbreyttur hámarkslífmassi í Tálknafirði og Patreksfirði eða 20 þúsund tonn og á það einnig við Arnarfjörð þar sem hámarkið er 20 þúsund tonn. Einnig er óbreytt ráðgjöf í Dýrafirði, 10 þúsund tonn.
Mikil aukning á Austurlandi
Á Austfjörðum er einnig lagt til að auka leyfilega hámarksfranleiðslu úr 21 þúsund tonnum í 42 þúsund tonna hámarkslífmassa. Ráðlagður hámarkslífmassi í Berufirði er 7.500 tonn, 12 þúsund tonn í Fáskrúðsfirði, 16 þúsund tonn í Reyðarfirði og 6.500 tonn í Seyðisfirði. Ekki er ráðlagt að eldi sé starfrækt í Stöðvarfirði.
Fyrri fyrirsögn fréttarinnar tilgreindi 50% aukningu í ráðlögðu eldismagni, tók það ekki tillit til breytinga í viðmiðum Hafrannsóknastofnunar og hefur hún því verið leiðrétt í samræmi við það.
