Norsku eldisfyrirtækin MOWI og Lerøy eru sökum um að nýta sér útbreiðslu kórónuveirunnar til þess að geta flutt óunninn fisk frá Noregi til vinnslu erlendis.

Matvælastofnun Noregs (n. Mattilsynet) veitti nýlega norska félaginu MOWI, stærsta eldislax framleiðenda í heimi, og eldisfyrirtækinu Lerøy undanþágu frá þarlendum reglugerðum sem gera það að verkum að fiskur með útlitsgalla, svokallaður vinnslufiskur (n. produksjonsfisk), verður að vera unninn í Noregi.

Samtök norskra vinnslustöðva (n. Sjømatbedriftene) saka fyrirtækin um að misnota aðstæður og hafa krafist þess að ákvörðun stofnunarinnar verði endurskoðuð, að því er fram kemur í umfjöllun Kyst og fjord.

Robert Eriksson, framkvæmdastjóri samtaka norskra vinnslustöðva, segir í fréttatilkynningu að ákvörðun norsku matvælastofnunarinnar sé til þess fallin að stofna gæðamerkingunni „Seafood from Norway“ í hættu, en unnið hefur verið að þróun þess í þrjátíu ár.

Rökstuðningurinn rangur

„Reglan um að vinnslufiskur (fiskur með útlitsgalla) skuli unninn í Noregi tryggir að norskar sjávarafurðir haldi hámarks gæðum og fær merkinguna „Seafood from Norway.“ […] Sjømatbedriftene vilja meina að MOWI og Lerøy nýta sér útbreiðslu kórónuveirunnar til þess að komast hjá norskum reglugerðum og árétta að norska Mattilsynet hefur ekki vald til þess að framkvæma eftirlit erlendis,“ segir Eriksson.

Fram kemur í umfjöllun Kyst og fjord að ástæða þess að fyrirtækin fengu undanþágu hafi verið að útbreiðsla kórónuveirunnar hafi dregið úr vinnslugetu í Noregi. Norsku vinnslustöðvarnar segja hins vegar rökstuðning fyrirtækjanna ekki standast skoðun.

„Yfir helgina hafði ég samband við fleiri fyrirtæki sem segjast búa yfir umframgetu til þess að vinna vinnslufisk. Ekkert þessara fyrirtækja hafa heyrt nokkuð frá MOWI eða Lerøy. Ákvörðunin er tekin á algjörlega röngum forsendum. Þess vegna hefur Sjømatbedriftene ákveðið að leggja fram kvörtun vegna ákvörðunarinnar,“ útskýrir Eriksson.

Robert Eriksson, framkvæmdastjóri Sjømatbedriftene. Ljósmynd/Sjømatbedriftene

Tengdar fréttir

Fiskeldi

Fjárfestingin 115 milljarðar króna

• Bátur Arnarlax verður fyrsti sinnar tegundar
• Lagareldismálið fyrst á dagskrá
• Gera niðurstöður umhverfisvaktana aðgengilegar
• Gagnrýna aðferðir við áhættumat

» Fleiri tengdar fréttir

Kórónuveiran Covid-19

Heimsfaraldurinn var æfing í seiglu

• Engar aukaverkanir eftir 217 bólusetningar
• „Við þurfum að vera tilbúin“
• Ríkið hafði betur gegn skjólstæðingi Arnars
• Hæstiréttur staðfestir efndaskyldu tveggja hótela

» Fleiri tengdar fréttir

• Blogga um frétt