Flutningaskip Samherja um Magellansund

Í tilefni þess að í ár eru liðin 500 ár frá því að portúgalski landkönnuðurinn Ferdinand Magellan sigldi í fyrsta sinn í gegnum sundið sem tengir Kyrrahaf og Atlantshaf í suðri, og síðar var kallað Magellansund, var ákveðið að mynda siglingu Harengus, annars flutningaskipa Samherja, í gegnum Magellansund á leið sinni vestur fyrir Suður-Ameríku.

Harengus er í leiguverkefnum hjá Green Sea í Belgíu og hefur lestað 4.000 tonn af uppsjávarfiski í San Vicente í Síle sem á að fara á markað í Nígeríu, að því er fram kemur á vef Samherja. Þar segir að lestun á farminum hafi „gengið vel og á Harengus að sigla til baka í gegnum Magellansund eftir nokkra daga. Sjóleiðin frá San Vicente til Nígeríu er nærri 6.400 mílur og mun siglingin taka um þrjár vikur“.

Flutningaskipið Harengus er útbúið frystilestum þar sem kössum er laushlaðið um borð. Uppsjávarfiskur er venjulega fluttur frá Suður-Ameríku í frystigámum, en vegna gámaskorts sem skapast hefur vegna kórónuveirufaraldursins var Harengus fengið í verkið.

Skipið var smíðað árið 1992 og er skráð í Færeyjum.

• 1 blogg um fréttina

Bloggað um fréttina

• Jóhann Elíasson: HVAR HEFUR SAMHERJI EKKI ÍTÖK OG ERU ÞEIR AÐ HASLA …