Kröfðust ekki starfsloka Guðmundar
Setja bókamerki
„Vegna umfjöllunar í Kastljósi þann 7. maí sl. vill Samkeppniseftirlitið taka fram að það hefur ekki krafist þess að Guðmundur Kristjánsson láti af starfi sem forstjóri Brims. Fyrir Samkeppniseftirlitinu liggur að taka afstöðu til þess hvort breyting hafi orðið á yfirráðum í Brimi, og ef svo er, hver áhrif þeirra eru á samkeppni,“ segir í tilkynningu á vef Samkeppniseftirlitsins.
Guðmundur, sem lét í síðustu viku af störfum sem forstjóri Brims hf., sagðist í Kastljósi á RÚV í gærkvöldi hafa orðið þreyttur á afskiptum Samkeppniseftirlitsins á félaginu. Greint var frá því í fyrradag að eftirlitið hefði ákveðið að hefja rannsókn er snýr að yfirráðum Guðmunds og tengdra aðila yfir félaginu.
Í tilkynningu Samkeppniseftirlitsins segir að „við úrlausn samrunamála geta vaknað spurningar um hvort stofnast hafi til yfirráða í tilteknu fyrirtæki. Ef aðili með yfirráð í einu fyrirtæki nær yfirráðum í öðru fyrirtæki telst samruni hafa átt sér stað í skilningi samkeppnislaga. Ef velta viðkomandi fyrirtækja uppfyllir tiltekin fjárhæðamörk kveða samkeppnislög á um að tilkynna beri Samkeppniseftirlitinu um samrunann áður en hann kemur til framkvæmda, svo eftirlitið geti metið hvort samruninn skaði samkeppni og kalli á íhlutun í samræmi við samkeppnislög.“
Bendir stofnunin á að athugun á yfirráðum felst í því að komast til botns í því hver eða hverjir geta í reynd haft afgerandi áhrif á ákvarðanir og viðskiptastefnu fyrirtækis. Þá ræðst matið Matið ræðst ekki af tilteknum eignarhlutföllum einum og sér, heldur geta ýmis önnur atriði haft áhrif á matið. Tekið er sértaklega fram samningsskuldbindingar, mæting á hluthafafundi, sameiginleg viðskiptasaga og fjölskyldutengsl.
Liður í öðru máli
Til athugunar er nú hvort stofnast hafi til yfirráða í Brimi, sem tilkynna hefði átt lögum samkvæmt til Samkeppniseftirlitsins áður en þau komust til framkvæmda. Nánar tiltekið er eftirlitið að taka afstöðu til þess hvort Útgerðarfélag Reykjavíkur hf., Fiskitangi ehf., KG Fiskverkun ehf. og FISK-Seafood eignarhaldsfélag (í dag RE-13 ehf.) hafi myndað yfirráð í Brimi. „Fyrir eftirlitinu liggur að afla frekari gagna og gefa öllum aðilum málsins ítrasta tækifæri á að koma skýringum og sjónarmiðum á framfæri. Ekki er hægt að fullyrða um endanlega niðurstöðu málsins fyrr en að undangenginni þessari rannsókn.“
„Athugunin hófst sem liður í rannsókn á kaupum Brims á Fiskvinnslunni Kambi hf. og Grábrók ehf. Tilkynnti Brim um þau kaup og tók eftirlitið afstöðu til málsins innan lögbundinna tímafresta. […] Niðurstaðan varð sú að svo væri ekki og því ekki ástæða til að gera athugasemdir við kaupin,“ segir í tilkynningu Samkeppniseftirlitsins.
Nýjar vísbendingar vegna viðskipta
Fram kemur að yfirráð í Brimi hafi einnig komið til skoðunar í tengslum við kaup Brims (þá HB Granda) á Ögurvík á árinu 2018. „Á þeim tíma þótti ekki forsenda til þess, á grundvelli fyrirliggjandi gagna og gegn eindreginni neitun félaganna, að slá því föstu að Útgerðarfélag Reykjavíkur hefði öðlast yfirráð í Brimi. Hins vegar var tekið fram að málið yrði hugsanlega tekið upp að nýju ef frekari vísbendingar kæmu fram sem bentu til yfirráða. Slíkar vísbendingar hafa nú komið fram.“
„Komist Samkeppniseftirlitið að þeirri niðurstöðu í athugun sinni að stofnast hafi til yfirráða í Brimi þarf ennfremur að taka afstöðu til þess hvort umræddum aðilum hafi borið að tilkynna um yfirráðin í sérstöku samrunamáli og hvort vanræksla á því kalli á viðurlög samkvæmt samkeppnislögum. […] Ef niðurstaðan verður sú að til tilkynningarskylds samruna hafi stofnast þarf síðan að taka efnislega afstöðu til hans,“ segir í tilkynningunni.
„Það þarf að vinna mikinn fjölda upp“
Sex hafa greinst með listeríu
Kostnaður meiri en milljón á fermetra
Gígbarmurinn hækkað frá því í gær
Æskuvinur Íslendings myrtur í Noregi
Skar höfuðleðrið af íslenskri konu
Handteknir eftir myndatöku í Vesturbæjarlaug
Vélsleðaslys: Þyrlan kölluð út á mesta forgangi