Stormar og stöðug fiskgengd í allan vetur

Áhöfnin á Bárði SH-81 kom til Ólafsvíkur í gær með um 20 tonn, en lokadagur vetrarvertíðar samkvæmt gömlu viðmiði var í gær, 11. maí. Þar með er afli Bárðar á vetrarvertíðinni frá áramótum orðinn 2.311 tonn af óslægðum afla upp úr sjó og er líklegt að um Íslandsmet sé að ræða hjá netabáti.

„Stanslaus fiskgengd, stöðugir stormar og hörkumannskapur,“ segir Pétur Pétursson, útgerðarmaður og skipstjóri, þegar hann er spurður hvað hafi einkennt vertíðina. Aflinn í marsmánuði var einstakur, alls 1.091 tonn. Bárður SH-81 kom nýr til landsins frá Danmörku í lok síðasta árs og er 23,6 metra plastbátur. Pétur eldri rær ýmist á nýja Bárði eða eldri báti með sama nafni, en sonur hans og nafni rær þá á nýja skipinu.

Samkvæmt upplýsingum sem skipverjar á Bárði höfðu aflað var mesti afli netabáts á vetrarvertíð til þessa 1.917 tonn hjá Þórunni Sveinsdóttur VE árið 1989.

Á myndinni eru, frá vinstri, Pétur Pétursson yngri, Eiríkur Gautsson, Guðjón Arnarson, Sveinbjörn Benediktsson, Pétur Pétursson eldri, Jóhann Eiríksson, Helgi Bjarnason, Sæbjörn Ágústson, Kristján Helgason og Höskuldur Árnason. aij@mbl.is