Fiskvinnslan Oddi hf. á Patreksfirði hefur ákveðið að hefja vinnslu á laxi sem framleiddur er í nærumhverfi félagsins á Vestfjörðum af Arnarlaxi og Arctic fish, að því er segir í fréttatilkynningu frá Odda. Gert er ráð fyrir að verkefnið skapi 16 til 18 heilsársstörf.

Fram kemur að Oddi hefur fjárfest vinnslulínu frá Marel sem nú er verið að stilla og hefja prófanir fyrir fullunnar laxaafurðir þar sem lögð er áhersla á bestu mögulegu nýtingu á hráefninu.

Telur fyrirtækið að hægt sé að hámarka gæði afurðanna með því að nýta nálægðina við uppeldisstöðvarnar. Samkvæmt áætlunum mun fyrst um sinn vera unnin 2.500 til 3.000 tonn af laxi í vinnslu Odda, en  magn kann að aukast í framtíðinni.

Tækifæri fylgja fiskeldinu

„Þetta er gríðarlega spennandi verkefni en á sama tíma mjög krefjandi þar sem mjög hörð samkeppni er um öflun hágæða laxahráefni eins og Arnarlax og Arctic Fish framleiða. Það er mat okkar í Odda að með tilkomu laxeldisins hafi skapast mörg tækifæri og nú sé rétti tíminn til að hefja vinnslu, þegar slátrun er nánast óslitin alla daga ársins. Stöðugleiki í framboði skiptir öllu fyrir sölumöguleika á ferskum flökum daglega inn á erlenda markaði. Með samningnum er gjaldeyrisöflun þjóðarinnar aukin, sem er ómetanlegt á þessum tímum,“ er haft eftir Skjöld Pálmasyni, framkvæmdastjóra Odda, í tilkynningunni.

Nálægð Patreksfjarðar við eldisstöðvarnar er talin til þess fallin að tryggja hámarks gæði afurða.

Tengdar fréttir

Fiskeldi

Fjárfestingin 115 milljarðar króna

• Bátur Arnarlax verður fyrsti sinnar tegundar
• Lagareldismálið fyrst á dagskrá
• Gera niðurstöður umhverfisvaktana aðgengilegar
• Gagnrýna aðferðir við áhættumat

» Fleiri tengdar fréttir

• Blogga um frétt