Rekstrartekjur Brims hf. á fyrsta ársfjórðungi námu 74,4 milljónum evra, en þær hækkuðu um 16,4 milljónir evra samanborið við sama tímabil í fyrra. Rekstrarhagnaður fyrir afskriftir var 7,7 milljónir evra, samanborið við 9,7 milljónir evra á sama tíma árið áður. Hagnaður félagsins var 0,4 milljónir evra, en var 3,9 milljónir evra á fyrsta fjórðungi síðasta árs.

Hagnaðurinn er um 64 milljónir króna á gengi dagsins í dag en ef miðað er við lokagengi ársfjórðungsins var hagnaðurinn um 62 milljónir króna.

Í tilkynningu frá félaginu til Kauphallarinnar er haft eftir Kristjáni Þ. Davíðssyni, stjórnarformanni félagsins, að afkoman markist nokkuð af erfiðu tíðarfari. Nefnir hann nokkuð lakari afla og þar með afkomu, einkum í veiðum og vinnslu uppsjávarafla. Þá valdi loðnubrestur annað árið í röð nokkru um afkomu. Félagið njóti hins vegar góðs af fjárfestingum undanfarinna missera, bæði í Ögurvík og sölufélögum í Asíu.

„Þrátt fyrir að verð sjávarafurða hafi almennt verið tiltölulega góð í upphafi árs eru horfur á mörkuðum óvissar vegna áhrifa heimsfaraldursins á neyslumynstur, sölu og flutninga,“ er haft eftir Kristjáni.

Heildareignir félagsins námu í lok fjórðungsins 704,2 milljónum evra, en þar af voru fastafjármunir 553,9 milljónir evra og veltufjármunir 150,3 milljónir evra. Eigið fé nam 306,4 milljónum evra og var eiginfjárhlutfallið 45,3%. Heildarskuldir félagsins voru 397,8 milljónir í lok mars.

Handbært fé frá rekstri Brims nam 21,3 milljónum evra en var á sama tíma í fyrra 22,2 milljónir evra. Fjárfestingarhreyfingar voru neikvæðar um 7,1 milljón evrur.

Tengdar fréttir

Brim

Brim fjárfesir í vistvænum krapavélum

• Stjórn Brims helst óbreytt
• Hagnaður Brims dróst saman um 20%
• Brim seldi nýkeypt skip vegna veiðibanns
• 3,8 milljarða hagnaður á þriðja ársfjórðungi

» Fleiri tengdar fréttir

• Blogga um frétt