Leitin í Vopnafirði heldur áfram í dag

Leit að sjómanninum Axel Jósefssyni Zarioh, sem talið er að fallið hafi fyrir borð af fiskiskipinu Erling KE-140 í Vopnafirði á mánudaginn, hófst klukkan hálftíu í morgun. Níutíu björgunarsveitarmenn taka þátt í leitinni, en þeir koma frá björgunarsveitum allt frá Djúpavogi til Akureyrar.

Leitarsvæðið nær frá Selnibbu norðan megin í Vopnafirði, inn fjörðinn, um sandfjörur og út að Búri sunnan megin í firðinum. Leitað verður bæði á sjó og á landi og verður flugdróni notaður við leitina ásamt því að gengnar verða fjörur.

Í tilkynningu frá lögreglunni á Austurlandi segir að samkvæmt veðurspá sé spáð vaxandi suðvestanátt þegar líður á daginn og er því búist við að leitarskilyrði versni gangi sú spá eftir. Leitað verður í dag á meðan hægt er og leitin skipulögð út frá aðstæðum á hverjum tíma.

• Blogga um frétt