„Þetta fór allt að skána þegar við komum heim“
Setja bókamerki
Tengdar fréttir
Samdráttur í sjávarútvegi
„Við erum hérna úti á torginu, eins og við köllum það, að reyna að ná grálúðu, en það er ekkert fjör í veiðunum,“ segir Sigþór Kjartansson, skipstjóri á Sólbergi, í samtali við 200 mílur. Sólbergið er nú statt á Grænlandssundi ásamt talsverðum fjölda íslenskra frystitogara. Þar á meðal eru Guðmundur í Nesi, Blængur, Örfirisey, Höfrungur, Gnúpur og Vigri, svo einhverjir séu nefndir. „Þeir eru hérna frystitogararnir allflestir held ég,“ segir Sigþór.
Aðstæður á mörkuðum vegna kórónuveirufaraldursins hafa hvatt skipin til þess að sækja í grálúðu og karfa að undanförnu að sögn skipstjórans. „Þetta er það helsta sem selst, grálúða og karfi. Þetta eru Asíu-afurðirnar sem er best að selja, þorskurinn fer hægt.“
„Þetta er svona kropp, það kroppast með tímanum,“ segir hann um gang veiða, en Sólbergið hefur verið á miðunum frá miðjum maí. Spurður hvenær búist er við að skipið komi til hafnar á ný segir Sigþór það vera komið fyrir sjómannadaginn 7. júní.
Sigþór segir búið að vera fínasta veður á túrnum. „Það voru tvær brælur, en það stóð stutt. Þannig að það er búið að vera gott hvað veðrið varðar. Það var fínasta veiði hérna í síðasta mánuði, en það hefur heldur dregið úr.“
Blaðamaður rifjar það upp að síðast er hann ræddi við Sigþór hafi Sólberg verið utan stranda Noregs á leið á miðin í Barentshafi um það leyti er gripið var til umfangsmikilla aðgerða til að sporna við útbreiðslu kórónuveirunnar. „Þetta fór allt að skána þegar við komum heim. Við hefðum bara þurft að koma fyrr,“ segir Sigþór.
Tengdar fréttir
Samdráttur í sjávarútvegi
Kvikan virðist nú skiptast til helminga
Aukin tíðni þungunarrofa hjá yngsta aldurshópnum
Hjón sluppu með skrekkinn
Þrjú og hálft ár fyrir skotárás í Úlfarsárdal
„Þögnin er ærandi“
„Það er skiljanlegt að þolinmæði þeirra sé lítil“
Markaðurinn hitnar og leiguverð hækkar hratt