Ráðherra opnaði Sjávarakademíuna

Lilja Alfreðsdóttir, mennta- og menningarmálaráðherra, opnaði formlega Sjávarakademíu Sjávarklasans í Húsi sjávarklasans við Grandagarð í Reykjavík í morgun. 

Ráðherra sagði við það tilefni að menntun skipti ávallt gríðarlega miklu máli en markmið Sjávarakademíunnar er að efla þekkingu og áhuga á stofnun fyrirtækja og nýsköpun sem tengist bláa hagkerfinu.

Fisktækniskólinn og Hús Sjávarklasans hafa unnið að gerð námsframboðs á framhaldsskólastigi á sviði haftengdrar nýsköpunar undir nafni „Sjávarakademían“. Brautin samsvarar alls einni önn (30 einingum) og getur verið metin til eininga og sem hluti af námsbraut í fisktækni. 

Brautin er skipulögð sem hagnýtt nám fyrir þá sem vilja kynna sér rekstur og stofna fyrirtæki á hinum ýmsu sviðum bláa hagkerfisins. Markhópur námsins er ungt fólk 18-25+ og með einhvern grunn, úr framhalds- eða háskóla, auk fólks sem vill breyta um starfsvettvang og kynna sér möguleika hinna ýmsu afurða hafsins og tengdrar þjónustu.   

Boðið verður upp á þrjá áfanga í sumar en þeir mynda eins konar inngang og kynningu á nýsköpun innan bláu auðlindarinnar. Áhersla er á kynningu á hinum ýmsu tegundum hráefnis og þjónustu, vöruþróun, gæðastöðlum og nýjum vinnslumöguleikum. Þá verður einnig lögð áhersla á sjálfbærni og kynningu á starfsemi nýsköpunarfyrirtækja, sem hafa haslað sér völl síðustu árin — og mörg hver eru staðsett í Húsi sjávarklasans á Grandagarði. 

Sumarnámið er stutt af mennta- og menningarmálaráðuneytinu og námskeiðsgjaldið er kr. 3.000. 

Að stofnun Sjávarakademíunnar standa Íslenski sjávarklasinn og Fisktækniskóli Íslands.

• Blogga um frétt