Þokan hreinsar fullkomlega

Ragnar Ólafsson, tæknistjóri D-Tech, segir nálgun fyrirtækisins byggjast á svokölluðu …
Ragnar Ólafsson, tæknistjóri D-Tech, segir nálgun fyrirtækisins byggjast á svokölluðu þokukerfi sem á augabragði fyllir rými af fíngerðri sótthreinsandi móðu sem kemst í allar glufur og göt, undir og yfir alla yfirborðsfleti, og sótthreinsar jafnt gólf, veggi og loft við snertingu. mbl.is/Arnþór Birkisson

Ekki er ósennilegt að kórónuveirufaraldurinn hafi valdið hugarfarsbreytingu hjá bæði neytendum og framleiðendum sjávarafurða. Vitundarvakning hefur átt sér stað um mikilvægi góðs hreinlætis og almenningur líka verið minntur rækilega á hve brýnt það er að hugsa vel um heilsuna með heilnæmu mataræði og heilbrigðum lifnaðarháttum.

Þetta skapar tækifæri fyrir íslenska fyrirtækið D-Tech sem býður upp á sjálfvirkar sótthreinsilausnir sem þykja með þeim öflugustu og skilvirkustu á márkaðinum. Ragnar Ólafsson, tæknistjóri D-Tech, segir nálgun fyrirtækisins byggjast á svokölluðu þokukerfi sem á augabragði fyllir rými af fíngerðri sótthreinsandi móðu sem kemst í allar glufur og göt, undir og yfir alla yfirborðsfleti, og sótthreinsar jafnt gólf, veggi og loft við snertingu. „Sótthreinsunin tekur mjög skamman tíma og notar um 10% af því vatni og 15% af því sótthreinsiefni sem þyrfti ef þrifið væri með hefðbundnum aðferðum. Sem dæmi um hve hratt má sótthreinsa með búnaði D-Tech má nefna að hjá Síldarvinnslunni í Neskaupstað er okkar lausn notuð til að sótthreinsa 3.000 fermetra vinnsluhúsnæði á 35 mínútum.“

Úðinn finnur allar glufur

Kveikt er á þokukerfi D-Tech eftir venjuleg þrif og því búið að spúla og skrúbba burt stærri agnir. Ragnar segir ekki þurfa að loftþétta rýmið sem þokan fyllir en æskilegt að lítil sem engin hreyfing sé á loftinu þar inni á meðan sótthreinsun stendur yfir. Þokan er mjög þétt, og skyggni aðeins um tveir metrar á meðan búnaðurinn er í gangi, en úðinn svo fíngerður að ekki fellur á gler eða fatnað, og hvergi hætta á að vökvi safnist upp. „Gott er að opna hlífar á vélbúnaði svo að þokan komist betur inn í öll skúmaskot, en jafnvel ef það er ekki gert leitar þokan um allt rýmið og drepur þær örverur sem þar þrífast. Hreinsiefnið drepur líka myglu svo að jafnvel ef einhverjir yfirborðsfletir draga í sig raka mun engin mygla myndast í kjölfarið.“

Eftir hreinsun dugar að einfaldlega opna glugga eða kveikja á loftræstikerfi og er þokan strax á bak og burt. „Þessi hraða sótthreinsun er mjög mikilvæg þegar mikið er að gera og starfsemi í gangi allan sólarhringinn því stöðva þarf vinnslu á meðan þrifið er og brýnt að geta gangsett vélarnar og byrjað framleiðslu á ný eins fljótt og kostur er.“

D-Tech er ungt fyrirtæki, stofnað 2014, og byggist hreinsikerfið á íslensku hugviti sem upphaflega var þróað í nánu samstafi við Samey. Búnaðinn má nota í fiskvinnslum á landi, um borð í skipum, og alls staðar þar sem matvæli eru framleidd. Ragnar segir fleiri notkunarmöguleika í skoðun og hefur D-Tech stofnað dótturfyrirtæki með það fyrir augum að nýta sótthreinsibúnaðinn t.d. í heilbrigðisgeira, á umönnunar- og öldrunarheimilum og í íþróttamannvirkjum. „Við höfum notað þokukerfið á okkar eigin skrifstofu án nokkurra vandkvæða, og það þrátt fyrir að á skrifstofunni séu allar okkar vinnutölvur, skjáir og ýmsir pappírar,“ útskýrir Ragnar og bætir við að þokukerfið gæti líka nýst til að m.a. sótthreinsa gesti við komuna á viðkvæma staði eins og spítala og öldrunarheimili og myndi þá stutt stopp í klefa með þokukerfi þýða að utanaðkomandi bæru ekki óvart með sér hættulegar örverur.

Orðsporið er það dýrmætasta

Dæmin sanna að nálgun D-Tech getur bundið enda á þrálát smitvandamál. Er hægt að koma kerfinu fyrir innan í matvælavinnslutækjum til að hreinsa þau enn betur og nefnir Ragnar árangur norsks laxeldisfyrirtækis sem glímdi við þrálátt listeríusmit. „Fyrir fimm árum vorum við fengin til að setja búnað okkar upp í gamalli verksmiðju sem laxeldisfélagið notaði, og reyndist helsti vandræðastaðurinn vera flokkari þar sem örverur gátu safnast upp og erfitt var að þrífa. Við settum upp úðakerfi í allri verksmiðjunni og við sjálfan flokkarann en strax á öðrum eða þriðja degi var ekki neina listeríu lengur að finna í húsinu.“

Ragnar minnir á að mikið sé í húfi fyrir framleiðendur en í tilviki norska laxeldisfyrirtækisins þýddi listeríuvandinn að félagið fékk að jafnaði tveimur norskum krónum lægra verð fyrir hvert kíló af laxi. „Markaðurinn hafði áttað sig á að ekki væri hægt að stóla á gæði framleiðslunnar og endurspeglaðist það í því verði sem fyrirtækið fékk. Á ársgrundvelli fór þessi seljandi á mis við u.þ.b. 40 til 60 milljónir norskra króna en búnaður D-Tech kostaði aðeins brot af þeirri upphæð,“ útskýrir Ragnar. „Þá er eftir að nefna fjölmörg tilvik þar sem alvarleg örverusmit hafa riðið matvælafyrirtækjum að fullu. Orðsporið er eitt það verðmætasta sem matvælaframleiðendur eiga.“

Til viðbótar þýðir enn betri sótthreinsun að hillulíf matvæla verður lengra. „Í rækjuframleiðslu höfum við séð að talning á örverum á lausfrystri rækju fór úr 2.700 á gramm niður fyrir 400 á gramm, sem jafngildir því að varan getur verið einn til tvo daga til viðbótar í kæli verslunar áður en gæði hennar byrja að rýrna.“

Nýjasta viðbótin við vöruframboð D-Tech er að bjóða þokulausnina á leigu til stærri matvælaframleiðenda. „Þá er búnaðurinn, uppsetning hans og allur sótthreinsir innifalinn í mánaðargjaldi, auk reglulegra eftirlitsheimsókna sérfræðinga D-Tech,“ segir Ragnar.

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.890 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »

Afurð Dags. Meðalverð
Þorskur, óslægður 3.7.20 270,82 kr/kg
Þorskur, slægður 3.7.20 294,37 kr/kg
Ýsa, óslægð 3.7.20 461,81 kr/kg
Ýsa, slægð 3.7.20 272,63 kr/kg
Ufsi, óslægður 3.7.20 57,58 kr/kg
Ufsi, slægður 3.7.20 91,37 kr/kg
Djúpkarfi 24.6.20 34,00 kr/kg
Gullkarfi 3.7.20 152,41 kr/kg
Litli karfi 15.6.20 10,00 kr/kg
Blálanga, óslægð 3.7.20 49,00 kr/kg

Fleiri tegundir »

3.7.20 Hanna SH-028 Grásleppunet
Grásleppa 1.484 kg
Samtals 1.484 kg
3.7.20 Jón Ásbjörnsson RE-777 Lína
Keila 175 kg
Karfi / Gullkarfi 125 kg
Hlýri 67 kg
Samtals 367 kg
3.7.20 Magga SU-026 Handfæri
Þorskur 1.067 kg
Ufsi 66 kg
Samtals 1.133 kg
3.7.20 Öðlingur SU-191 Handfæri
Þorskur 809 kg
Ufsi 73 kg
Karfi / Gullkarfi 5 kg
Samtals 887 kg

Skoða allar landanir »

Afurð Dags. Meðalverð
Þorskur, óslægður 3.7.20 270,82 kr/kg
Þorskur, slægður 3.7.20 294,37 kr/kg
Ýsa, óslægð 3.7.20 461,81 kr/kg
Ýsa, slægð 3.7.20 272,63 kr/kg
Ufsi, óslægður 3.7.20 57,58 kr/kg
Ufsi, slægður 3.7.20 91,37 kr/kg
Djúpkarfi 24.6.20 34,00 kr/kg
Gullkarfi 3.7.20 152,41 kr/kg
Litli karfi 15.6.20 10,00 kr/kg
Blálanga, óslægð 3.7.20 49,00 kr/kg

Fleiri tegundir »

3.7.20 Hanna SH-028 Grásleppunet
Grásleppa 1.484 kg
Samtals 1.484 kg
3.7.20 Jón Ásbjörnsson RE-777 Lína
Keila 175 kg
Karfi / Gullkarfi 125 kg
Hlýri 67 kg
Samtals 367 kg
3.7.20 Magga SU-026 Handfæri
Þorskur 1.067 kg
Ufsi 66 kg
Samtals 1.133 kg
3.7.20 Öðlingur SU-191 Handfæri
Þorskur 809 kg
Ufsi 73 kg
Karfi / Gullkarfi 5 kg
Samtals 887 kg

Skoða allar landanir »