Farið að vísindalegri ráðgjöf

Sjávarútvegsráðherra fer að vísindalegri ráðgjöf Hafrannsóknastofnunar um leyfilegan heildarafla í íslenskri fiskveiðilögsögu fyrir næsta fiskveiðiár. Reglugerð um heildarafla fyrir fiskveiðiárið sem hefst 1. september var gefin út í gær.

Tekið er fram í tilkynningu ráðuneytisins að ráðgjöf Hafró byggi á því að nýta stofna miðað við hámarksafrakstur að teknu tilliti til vistkerfis- og varúðarnálgunar.

6% lækkun aflamarks þorsks

Hafrannsóknastofnun ráðlagði 6% lækkun á aflamarki þorsks byggt á aflareglu stjórnvalda, úr 272.411 tonnum í 256.593 tonn. Helsta ástæða lækkunar var lækkun í stofnmælingum botnfiska auk þess sem að þessu sinni voru vísitölur 1 til 14 ára þorsks í stað 1 til 10 ára.

Samkvæmt aflareglu verður aflamark ýsu 45.389 tonn fiskveiðiárið 2020/2021 sem er 9% hækkun frá fiskveiðiárinu 2019/2020. Ástæða hækkunarinnar eru bættar nýliðunarhorfur. Gert er ráð fyrir að viðmiðunarstofn ýsu stækki á næstu tveimur árum en eftir það er líklegast að hann standi í stað. Samkvæmt aflareglu verður aflamark ufsa 78.574 tonn sem er minnkun um 2% frá síðasta ári.

Árgangar gullkarfa hafa verið með lakasta móti frá 2009 og af þeim sökum hefur hrygningarstofn minnkað á undanförnum árum og mun sú þróun halda áfram á næstu árum. Samkvæmt aflareglu verður heildaraflamark gullkarfa 38.343 tonn sem er 9% lægri ráðgjöf en fyrir síðasta fiskveiðiár. Ráðgjöf fyrir grálúðu hækkar um 10% frá fyrra ári og er 23.530 tonn fyrir komandi fiskveiðiár.

Haft er eftir Kristjáni Þór Júlíussyni sjávarútvegsráðherra í tilkynningu um ákvörðun heildaraflamarks að ráðgjöf Hafrannsóknastofnunar beri með sér að helstu nytjastofnar séu sterkir. Hins vegar blasi við nýliðunarbrestir í nokkrum tegundum sem Hafró í samráði við ráðuneytið muni þurfa að mæta með frekari rannsóknum.

• 2 blogg um fréttina

Bloggað um fréttina

• Jóhann Elíasson: "VÍSINDALEG RÁÐGJÖF"??????????
• Halldór Egill Guðnason: Besta fiskveiðistjórnunarkerfi í heimi?