Sjávarafurðir 43% vöruútflutnings

Fluttar voru út sjávarafurðir fyrir 22 milljarða króna í júní sem er 42% meira en í sama mánuði í fyrra samkvæmt bráðabirgðatölum Hagstofunnar sem birtar voru í morgun. Þetta kemur fram í fréttabréfi Samtaka fyrirtækja í sjávarútvegi.

Þar segir að aukningin sé 32% sé útflutningurinn mældur í erlendri mynt. „Þessa myndarlegu aukningu má fyrst og fremst rekja til grunnáhrifa, en útflutningsverðmæti sjávarafurða í júní í fyrra voru óvenju lítil, hvort sem talið er í krónum eða erlendri mynt.“ Þá voru útflutningsverðmæti sjávarafurða meiri bæði í júní 2017 og 2018.

127 milljarðar

Vöruútflutningur á fyrsta árshelmingi nam 296 milljarða króna en var 307 milljarðar á sama tímabili í fyrra og hefur því dregist saman um 3,6%.

Af þeim 296 milljörðum sem aflað var við vöruútflutning má rekja 127 milljarða króna, eða 43%, til sjávarafurða. Í fyrra stóðu sjávarafurðir fyrir 128 milljörðum eða 41,6% af vöruútflutningi á fyrstu sex mánuðum ársins. Samdráttur í útflutningsverðmætum sjávarafurða er því rétt um 1% milli ára, en rúm 8% ef mælt er í erlendri mynt

Bent er á að hlutdeild sjávarafurða í útflutningi hefur ekki verið meiri frá árinu 2016.

• Blogga um frétt