Fyrir litlar 73 milljónir á viku er hægt að leigja lúxusskipið Ragnar, sem nú liggur við bryggju á Akureyri. Ekki er vitað hverjir dvelja um borð, en ljósmyndari mbl.is náði mynd af skipinu sem sést hefur til síðustu daga á ferð sinni um landið.
Skipið er auglýst á heimasíðu Burgessyachts og er hluti af glæsilegu safni lystisnekkja sem þar bjóðast. Það er er smíðað árið 2012 í Hollandi, sem skip ætlað til iðnaðarstarfsemi, en hefur nýlega verið breitt í lúxusskip sem þjónar djúpvasa viðskiptavinum sem vilja sigla um heimskautin í algeru næði.
Ragnar í Arnarfirði.
Ljósmynd/Eggert Elfar Jónsson
Auglýst pláss er fyrir 12 farþega í 9 káetum og aðbúnaður er eins og best verður á kosið. Ríkulegur búnaður er til afþreyinga á norðurslóðum s.s. léttabátur, sækettir og vélsleðar. Að auki má panta með skipinu Airbus EC145 þyrlu og þriggja manna kafbát af gerðinni U-boat Worx C-Explorer. Minna má það varla vera fyrir verðmiðann: 525.000 USD á viku. Hér að neðan má sjá myndband af endurgerð skipsins.
Glöggur ferðalangur sá til skipsins þar sem það sigldi um Breiðafjörð á norðurleið og rakst síðar á það dólandi við botn Arnarfjarðar, skammt undan landi við Dynjanda. Skipið hefur nú viðdvöl á Akureyri. Í samtali við Pál Ólafsson, hafnarstjóra Hafnarsamlags norðurlands, segist hann ekki hafa upplýsingar um farþega skipsins. Hann útskýrir að í flestum tilvikum kjósi slíkir gestir næði og hafi sig lítt í frammi. Hann bætir við að þar á bæ hafi menn orðið varir við talsverða aukningu í fyrirspurnum og áhuga erlendis frá um viðkomu slíkra lúxusfleyta.