Samskiptaörðugleikar urðu til þess að fimm skipverjar á súrálsskipinu Seaboss fylgdu ekki fyrirmælum um einangrun og snæddu í matsal skipsins ásamt öðrum í áhöfninni. Þegar sýni úr tveimur þeirra reyndust jákvæð fyrir kórónuveirunni voru fimmmenningarnir fluttir í sóttvarnahúsið við Rauðarárstíg og fallið var frá fyrirhuguðum áhafnarskiptum.
Þetta staðfestir Garðar Jóhannsson, framkvæmdastjóri Nesskipa, umboðsaðila Seaboss á Íslandi.
Seaboss hefur legið við bryggju á Grundartanga undanfarna daga og til stóð að áhafnarskipti færu fram meðal fimm áhafnarmeðlima. Þeir fimm sem taka áttu sæti í áhöfn komu til landsins með flugi og fóru í skimun við landamærin. Tveir þeirra reyndust vera með kórónuveirusmit.
„Áður en þeir fara um borð í skipið fær skipstjórin fyrirmæli um að þeir verði að bíða eftir niðurstöðu úr skimunum og verði að vera einangraðir á meðan, en það verður einhver samskiptafeill um borð sem leiðir til þess að þessir fimm fara í matsalinn,“ segir Garðar, en að skipstjórinn hafi axlað fulla ábyrgð og áttað sig á því hvað gerst hafi.
Starfsfólk í landi átti ekkert samneyti við áhöfn
Hafði skipstjórinn rakleiðis samband við Nesskip, sem höfðu samband við almannavarnir og landlækni. „Þegar þessi staða kemur upp er allt þetta áhafnarskiptaferli stoppað, þannig að það fór enginn af skipinu eins og til stóð, heldur eru þessir fimm sem áttu að fara enn um borð í skipinu og þeir sem unnu við losun skipsins voru ekki í neinu samneyti við áhöfnina,“ segir Garðar.
„Sem betur fer, þótt það séu þarna fimm í sóttvarnahúsinu, sé ég ekki betur en málið í heild sinni sé „under control“ og hafi verið höndlað af fagmennsku.“
Brottför Seaboss frá Grundartanga er áætluð klukkan 14 í dag. Undir venjulegum kringumstæðum myndi hafnsögumaður frá Faxaflóahöfnum fara um borð í skipið. Það verður hins vegar ekki gert að þessu sinni, að sögn Gísla Gíslasonar hafnarstjóra. Þess í stað munu tveir dráttarbátar draga skipið út úr höfninni.