Birgir Sævar í fimmtánda róðurinn með afa

Birgir Sævar Víðisson á Húsavík hefur að undanförnu verið til sjós með afa sínum Guðmundi A. Jónssyni sem gerir út strandveiðibátinn Jón Jak ÞH 8. „Við höfum fiskað ágætlega. Oft komið að landi með um hálft tonn eftir daginn og tvisvar sinnum með fullan skammt sem eru 774 kíló,“ segir Birgir sem á miðvikudag fór í fimmtánda róðurinn með afa sínum.

Þeir hafa gjarnan verið á skaki við Flatey á Skjálfanda, þangað sem er um klukkustundarstím frá og til Húsavíkur.

„Sumarið hjá mér hefur verið óvenjulegt. Ég hef alltaf verið mikið í fótboltanum með og æfi og keppi með 3. og 4. flokki Völsungs. Var svo óheppinn að ristarbrotna í fyrsta leik sumarsins og eftir það þurfti ég að vera fimm vikur með fótinn í gifsi. Þegar gifsið var tekið fór ég á sjóinn með afa og er byrjaður aftur í boltanum. Þetta lofar góðu,“ segir Birgir Sævar.

Hann er fjórtán ára, fæddur árið 2006 og fer því í 9. bekk í vetur og vetrarstarfið í Borgarholtsskóla á Húsavík byrjar eftir nokkra daga. Að baki er sumar með minningum um fiskveiðar, fótbolta og fót í gifsi.