Hagnaður Brims á öðrum ársfjórðungi nam fimm milljónum evra, eða 813,7 milljónum króna. Hagnaður útgerðarfélagsins á fyrri helmingi ársins nam 5,4 milljónum evra, eða um 878,8 milljónum króna. 

Þetta kemur fram í uppgjöri Brims á öðrum ársfjórðungi 2020.

Rekstrartekjur samstæðunnar á öðrum ársfjórðungi voru 60,3 milljónir evra og 133,1 milljón evra á fyrri árshelmingi.

Aukningu rekstrartekna má fyrst og fremst rekja til þess að sölufélög í Asíu eru hluti af samstæðunni í ár, en félögin eru hluti af samstæðureikningsskilum Brims frá 1. október í fyrra.

Í lok júní gerði samstæðan út 10 fiskiskip, en línubátarnir Kristján HF-100 og Steinunn HF-108 bættust við þegar Grunnur ehf. og Grábrók ehf. urðu hluti af samstæðunni 1. maí.

Á fyrri helmingi ársins 2020 var afli skipa samstæðunnar 23,0 þúsund tonn af botnfiski og 34,0 þúsund tonn af uppsjávarfiski. Á sama tíma 2019 var afli skipa samstæðunnar 26,5 þúsund tonn af botnfiski og 43,6 þúsund tonn af uppsjávarfiski.

Umtalsverð áhrif kórónuveirunnar

Áhrif veirufaraldursins COVID-19 á rekstur samstæðunnar hafa verið umtalsverð á  tímabilinu. og hafa stjórnendur og starfsmenn félagsins markvisst unnið að því að hlúa að öryggi starfsmanna. Með samstilltu átaki hefur tekist að koma í veg fyrir röskun á starfseminni, segir í tilkynningunni. Gripið hefur verið til margháttaðra varnaraðgerða gegn smiti og mikil áhersla lögð á aukið hreinlæti, aðskilnað starfsmanna, takmörkun á aðgengi að starfsstöðvum og annað sem tengist sóttvarnaaðgerðum. 

„Erfiðar gæftir og minni veiði uppsjávarfisks, áhrif covid-heimsfaraldursins á markaði og gagnger endurnýjun og tæknivæðing botnfiskvinnslu félagsins í Norðurgarði einkenndu rekstur á fyrri árshelmingi.  Í ljósi framangreindra aðstæðna er niðurstaða uppgjörs Brims á fyrri árshelmingi ársins 2020 ásættanleg,“ segir Kristján Þ. Davíðsson, stjórnarformaður Brims, í tilkynningunni.

Tengdar fréttir

Brim

Stjórn Brims helst óbreytt

• Hagnaður Brims dróst saman um 20%
• Brim seldi nýkeypt skip vegna veiðibanns
• 3,8 milljarða hagnaður á þriðja ársfjórðungi
• „Það þorir enginn að anda á hann“

» Fleiri tengdar fréttir

• Blogga um frétt