Yfirborðshiti sjávar umhverfis landið í ágúst mældist svipaður í ár og í fyrra samkvæmt niðurstöðum úr leiðangri Hafrannsóknastofnunar sem lauk í gær. Tekið er fram á vef stofnunarinnar að frekari úrvinnsla gagna úr leiðangrinum fer fram á næstu mánuðum.

Mælingar voru framkvæmdar á yfirborði og á 50 metra dýpi. Fram kemur að á sumrin er „lagskipting í vatnssúlunni þar sem yfirborðslagið er heitara og ræður þykkt yfirborðslagsins miklu um hita þess.“ Var hiti við yfirborð níu til tólf gráður við landið sunnanvert en sex til tíu gráður á Norðurmiðum. Þá segir að „lítill munur var á hita milli yfirborðs og 50 metra dýpis í hlýsjónum fyrir sunnan og vestan landið.

Mynd/Hafrannsóknastofnun

Mynd/Hafrannsóknastofnun

Leiðangurinn tók 15 daga og var farinn á Bjarna Sæmundssyni, rannsóknaskipi Hafrannsóknastofnunar. Tilgangur hans var að framkvæma mælingar á ástandi sjávar og var mælt á 213 stöðvum á sniðum sem ná yfir helstu sjógerðir við landið og inni á fjörðum og flóum.

Ýmsum búnaði sinnt

„Vöktun á eðlis- og efnafræðilegum eiginleikum sjávar er eitt af föstum verkefnum Hafrannsóknastofnunar. Markmið þess er að vakta langtímabreytingar á umhverfisþáttum í hafinu umhverfis Ísland. Í því felast m.a. að gera endurteknar mælingar á hitastigi, seltu, súrnun sjávar og styrk næringarefna á stöðvum kringum Ísland í fjórum rannsóknaleiðöngrum ár hvert,“ segir á vef stofnunarinnar.

Hafrannsóknastofnun styðst við ýmsan tækjakost. Ljósmynd/Svanhildur Egilsdóttir

Fram kemur að einnig var sinnt gagnaöflun vegna verkefnis þar sem skoðuð eru útbreiðsla, uppruni og afdrif loðnuungviða. Auk þess var ferðin nýtt til þess að sinna ýmsum tækjabúnaði, en stofnunin fylgist meðal annars með straumum á tveimur stöðum á landgrunninu, í Grænlandssundi er mældur yfirfallsstraumur úr Norðurhöfum og á Hornbanka er innflæði Atlantssjávar á Norðurmið mælt.

Tengdar fréttir

Hafrannsóknastofnun

Hafa kortlagt um sex þúsund ferkílómetra

• Vísar gagnrýni á togararall á bug
• Telur stærð nytjastofna stórlega vanmetna
• „Allir um borð eru afskaplega hjálplegir“
• Samstarfssamningur Hafró og NMSÍ undirritaður

» Fleiri tengdar fréttir

• Blogga um frétt