Eftir að hafa elst við snjókrabba í Barentshafi í nokkur ár tók Gísli Unnsteinsson strandveiðar við Ísland föstum tökum í sumar. Hann kom að landi með rúmlega 46 tonn á báti sínum Steinunni ÁR 34, sem gerður er út frá Þorlákshöfn, og var aflahæstur á strandveiðunum. Hann lætur vel af þessum veiðiskap og segir hann skipta miklu fyrir sjávarpláss hringinn í kringum landið.

Gísli gerir út frá Þorlákshöfn og hóf strandveiðar þaðan í byrjun maí, reri frá Vestmannaeyjum frá miðjum júní fram í miðjan júlí og lauk vertíðinni síðan frá Höfn í Hornafirði. Hann segir að ágætisgangur hafi verið í veiðunum og náði samtals 43 róðrum áður en skellt var í lás frá og með fimmtudeginum 20. ágúst. Frá þeim tíma voru strandveiðar bannaðar þar sem viðmiðunarafla var náð í þorski. Þá hafði Gísli náð sjö róðrum í ágústmánuði, en ekki ellefu eins og ýmsir aðrir.

Mögulegt var að ná 47 róðrum í strandveiðum sumarsins og einn náði þeim róðrafjölda, en nokkrir voru með 46 róðra. Gísli var með mestan heildarafla á vertíðinni, samtals rúm 46 tonn og þar af um 35 tonn af þorski. Nokkrir voru með meiri þorskafla. Fram hefur komið að aflaverðmæti þeirra sem mest öfluðu getur hafa verið um tólf milljónir króna.

„Það er bagalegt að frá lokum strandveiðanna verður báturinn bundinn fram yfir mánaðamótin þar sem við komumst ekki út úr strandveiðikerfinu. Þó svo að veiðum sé lokið erum við bundnir í kerfinu og megum ekkert gera fyrr en í byrjun september,“ segir Gísli í samtali í Morgunblaðinu í dag. Hann stefnir á að ná sér í leigukvóta og er að auki með smá byggðakvóta.

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir