Tilkynnt var á starfsmannafundi hjá Herjólfi ohf. síðdegis í dag að öllum starfsmönnum fyrirtækisins yrði sagt upp. Bergur Þorkelsson, formaður Sjómannafélags Íslands, staðfestir þetta í samtali við 200 mílur.

Hann segir að stéttarfélaginu hafi ekki verið tilkynnt áform félagsins og félagsmenn hafi sjálfir látið vita í kjölfar fundarins í dag. Bergur kveðst fátt vita um tildrögin en gerir ráð fyrir að uppsagnirnar tengist óvissu í rekstri.

Fram kemur í fréttatilkynningu sem Herjólfur ohf. sendi frá sér nú síðdegis kemur fram að „áætluð áhrif vegna kórónaveirunnar eru veruleg og ekki liggur fyrir niðurstaða eða ákvörðun ríkisins um að bæta í núverandi þjónustusamning vegna áhrifa á reksturinn. [...] Vinna við endurskoðun á frekari fjárframlögum og á rekstri félagsins er í gangi þó engin niðurstaða liggi fyrir. Þeirri vinnu verður hraðað eins og kostur er.“

Eyjafréttir sögðu fyrst frá málinu og segir í umfjöllun þess að gert sé ráð fyrir að allir starfsmenn starfi uppsagnarfrest sinn, eða þrjá mánuði. Herjólfur mun því hafa óskerta þjónustu til 1. desember.

Ekki hefur tekist að ná sambandi við Guðbjart Ellert Jónsson, framkvæmdastjóra Herjólfs ohf., við vinnslu fréttarinnar.

Uppfært 16:10 Herjólfur ohf. sendi frá sér fréttatilkynningu um uppsagnirnar og hefur fréttin verið uppfærð í samræmi við það.

Tilkynning Herjólfs ohf. í heild:

Vestmannaeyjaferjan Herjólfur ohf. hóf þann 20. ágúst s.l. ferli að hópuppsögnum allra starfsmanna félagsins í samræmi við lög um hópuppsagnir nr. 63/2000 án þess að endanleg niðurstaða hafi legið fyrir. Stjórn félagsins hefur nú tekið þá sársaukafullu ákvörðun að segja upp öllum starfsmönnum. Er það gert í varúðarskyni þar sem stjórnin telur óábyrgt að halda út í frekari óvissu með rekstur félagsins að öllu óbreyttu.

Áætluð áhrif vegna kórónaveirunnar eru veruleg og ekki liggur fyrir niðurstaða eða ákvörðun ríkisins um að bæta í núverandi þjónustusamning vegna áhrifa á reksturinn.

Einnig telur stjórn félagsins að ekki hafi verið staðið fyllilega við gerðan þjónustusamning vegna ferjusiglinga milli lands og Eyja.

Vinna við endurskoðun á frekari fjárframlögum og á rekstri félagsins er í gangi þó engin niðurstaða liggi fyrir. Þeirri vinnu verður hraðað eins og kostur er.

Tengdar fréttir

Kórónukreppan

Áfangaheimilinu lokað ef ekki er gripið inn í

• „Þetta er allt saman á fleygiferð“
• Of harðar aðgerðir í faraldrinum
• Sjá fram á minna atvinnuleysi
• „Það er best að hafa samræmi í þessu“

» Fleiri tengdar fréttir

• Blogga um frétt