Eliza og Heiðrún héldu upp á Fishmas

„Mikið er það nú undarlegt og í raun áhættusamt að láta taka af sér ljósmyndir þegar maður leggur sér mat til munns … en um leið er það gaman og því naut ég þess mjög að taka þátt í átakinu „Fishmas“ í gær,“ segir Eliza Reid, forsetafrú Íslands, á facebooksíðu sinni í dag.

Vísar hún til markaðsátaksins Fishmas sem þá var ýtt úr vör, en því er meðal annars ætlað að auka vitund fólks á erlendum mörkuðum um gæði og heilnæmi íslensks fisks. Er átakinu aðallega beint að Bretlandi og er markmiðið að fá Breta til að hafa úrvalsfisk á borðum sínum, sjálfbæran og að sjálfsögðu af Íslandsmiðum.

Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, setti átakið formlega af stað í gær ásamt Elizu.

„Það er ánægjulegt að vera búin að ýta markaðsherferðinni formlega úr vör og við erum virkilega þakklát að njóta aðstoðar Elizu Reed enda ekki hægt að hugsa sér betri talsmann. Við eigum verðugt verkefni fyrir höndum en ætlum okkur að auka verðmæti íslenska fisksins, vopnuð léttleika og góðum sögum, um afurðina og umhverfi hennar,“ segir Heiðrún Lind.

Yfirskrift herferðarinnar er Fishmas. mbl.is/Árni Sæberg

Vitund um íslenskan fisk fari minnkandi

Áður hefur mbl.is greint frá því að íslensk sjávarútvegsfyrirtæki hafa sameinast undir slagorðinu Seafood from Iceland, til að auka útflutningsverðmæti sjávarafurða héðan með einu upprunamerki.

Yfirskrift þessarar herferðar er eins og áður sagði Fishmas og verður hún fyrst og fremst keyrð á samfélagsmiðlum. Opnaður hefur verið vefurinn fishmas.com þar sem fólk getur lært að elda tíu einfalda en gómsæta fiskrétti heima.

„Íslendingar hafa löngum verið þekktir sem fiskveiðiþjóð í Bretlandi. Nýleg könnun sýndi hins vegar að vitund yngra fólks um íslenskan fisk fer minnkandi. Af þessum sökum meðal annars er ráðist í Seafood from Iceland-herferðina til að auka vitund um íslenskan fisk meðal almennings. Breskir heildsalar þekkja þó fiskinn vel, enda átt í traustu viðskiptasambandi við íslensk fyrirtæki í áratugi um kaup á sjávarafurðum af einstökum gæðum,“ segir í tilkynningu vegna átaksins.

„Almenningur í Bretlandi þekkir vel hreina og fallega íslenska náttúru. Nú munu Bretar fá að kynnast íslenskum sjávarútvegi enn betur, sem er rótgróin og tæknivædd atvinnugrein, læra að elda girnilega fiskirétti og að maginn kallar í ríkari mæli á sjávarfang af Íslandsmiðum.“

• Blogga um frétt