Yfir 80 sótt um í Sjávarakademíunni

Mikil ásókn hefur verið í nám hjá Sjávarakademíunni. Nú þegar er komnar yfir 80 umsóknir um nám í akademíunni í haust. Það er fimmfalt meira en gert hafði verið ráð fyrir við stofnun hennar fyrr á árinu. Þetta kemur fram í fréttatilkynningu Sjávarklasans. 

Áhugann má rekja til vakningar á meðal ungs fólks um tækifærin í bláa hagkerfinu, umhverfismálum og sjálfbærni. Í Sjávarakademíunni hitta nemendur frumkvöðla og kynnast því hvernig þau koma hugmynd í framkvæmd. 

Ná betur til ungs fólks

Sjávarakademían er samstarfsverkefni Sjávarklasans og Fisktækniskólans. Akademían býður upp á nám sem stendur yfir í eina önn og er áhersla lögð á nýsköpun, sjálfbærni og tækifæri í bláa hagkerfinu. Námið fer fram í Húsi sjávarklasans á Grandanum en einnig er lögð áhersla á að nemendur fari í kynnisferðir í haftengd fyrirtæki á Suðurnesjum. 

„Með þessu samstarfi við Sjávarklasann um Sjávarakademíuna erum við greinilega að ná betur til ungs fólks,“ segir Ólafur Jón Arnbjörnsson skólastjóri Fisktækniskólans.  „Við erum líka á réttum tíma þar sem aldrei í sögunni hefur jafn mikið verið rætt um fæðuöryggi hérlendis eins og undanfarna mánuði og tækifærin í þeim efnum í hafinu við Ísland eru mikil.“

• Blogga um frétt