Ekki kvartað undan afla en veðrið mætti vera betra

„Það gekk vel að veiða ef tekið er tillit til þess að við vorum á sífelldum flótta undan veðri,“ segir Jón Valgeirsson, skipstjóri á ísfisktogaranum Bergeyju VE, í færslu á vef Síldarvinnslunnar. Bergey kom til hafnar í Vestmannaeyjum í morgun með fullfermi og var uppistaða aflans ufsi.

„Við byrjuðum í Sláturhúsinu og síðan færðum við okkur vestur á Öræfagrunn, Kötlugrunn og loks í Reynisdýpið. Það var ekkert hægt að kvarta undan aflanum en veðrið hefði mátt vera miklu betra. Aflanum verður landað í dag og veðurútlit mun síðan hafa mikið að segja um framhaldið,“ segir Jón.

Fram kemur í færslunni að systurskipið Vestmannaey VE hefur verið að karfaveiðum fyrir sunnan og vestan Eyjar. Þá hefur afli hefur verið ágætur á daginn en lélegur yfir nóttina. Gert er ráð fyrir að skipið fylli í kvöld og landi í Eyjum.

• Blogga um frétt