Lækkun krónunnar kom sjávarútveginum til bjargar

Veiking krónunnar hefur komið í veg fyrir verulegan samdrátt í sjávarútvegi samhliða samdrætti í hagkerfinu öllu á fyrstu tíu mánuðum ársins. Þá hafi lægra gengi hennar vegið upp á móti lækkun afurðaverðs og mikils samdráttar í útfluttu magni sjávarafurða.

Þetta má lesa úr síðustu greiningu sem birt hefur verið á Radarnum. Þar er vísað til þess að nýjustu tölur Hagstofunnar sem birtar voru í síðustu viku sýna að útflutningsverðmæti sjávarafurða á tímabilinu janúar til október hafi numið 224 milljörðum króna, en það er nánast óbreytt frá sama tímabili í fyrra.

Frétt af mbl.is

„Staðan á mörkuðum umturnaðist á örskömmum tíma“

„Áhrifin af gengisveikingu krónunnar eru þó töluverð og mælist rúmlega 9% samdráttur á milli ára sé tekið tillit til þeirra,“ segir í greiningunni. Þá segir að af þessum 9% megi rekja átta prósentustig til samdráttar í útfluttu magni og um eitt prósentustig til lækkunar á afurðaverði í erlendri mynt.

Nær til fleiri tegunda

Samdrátturinn í útfluttu magni er fyrst og fremst vegna loðnubrests. Þrátt fyrir að loðnubrestur er nú annað árið í röð kom til samdráttar þar sem „sala á loðnubirgðum vóg nokkuð drjúgt í útflutningstölum síðasta árs.“ Þá hafa á fyrstu tíu mánuðum ársins útflutningsverðmæti uppsjávarafurða í erlendri mynt verið 23% minni í ár en á síðasta ári.

Á sama tíma hefur lítil breyting orðið á útflutningsverðmæti þorskafurða, en samdráttur hefur orðið í öðrum botnsjávartegundum. Mesti samdrátturinn er í ufsa, en einnig hefur orðið samdráttur í ýsu og karfa. Þá ber að vekja athygli á að á fiskveiðiárinu sem lauk í september var aflamark í ýsu 28% minna en fiskveiðiárið á undan.

Útflutningsverðmæti flatfisks hefur dregist saman um 14% á milli ára og skelfisks um 24%.

Frétt af mbl.is

Lækka aflamark ýsu um 28%

• Blogga um frétt