„Helvítis brælur að undanförnu og erfitt tíðarfar“

Bæði Bergey VE og Vestmannaey VE hafa verið í höfn og beðið eftir því að hvassviðrið á Austurlandi gangi niður, en skipin hafa verið við veiðar austur af landinu að undanförnu, að því er segir á vef Síldarvinnslunnar.  Þar segir að Bergey VE hafi landað á þriðjudag í Neskaupstað og Vestmannaey VE á miðvikudag. Síðan landaði Bergey á ný á Eskifirði í gærmorgun.

Birgir Þór Sverrisson, skipstjóri á Vestmannaey, kveðst ekki sáttur við tíðarfarið. „Það eru búnar að vera helvítis brælur að undanförnu og erfitt tíðarfar, en það koma hlé inn á milli. Ég geri ráð fyrir að við förum út í nótt og það spáir vel næstu daga.“

• Blogga um frétt