Samherji hefur birt á heimasíðu sinni tölvupóstsamskipti Kastljóss við Seðlabanka Íslands. Eru samskiptin á milli Ingibjargar Guðbjartsdóttur, þáverandi framkvæmdastjóra gjaldeyriseftirlits Seðlabankans og Helga Seljan fréttamanns Ríkisútvarpsins í aðdraganda umfjöllunar Kastljóss um verðlagningu á karfa.

Samskiptin fékk Samherji afhent frá Seðlabanka Íslands. Tölvupóstarnir á milli Helga og Ingibjargar eru frá 20. febrúar til 26. mars árið 2012. Í ljósi þessa er því haldið fram að Seðlabankinn hafi sagt ósatt fyrir héraðsdómi árið 2015 um að engin samskipti hefðu átt sér stað við fjölmiðla í aðdraganda húsleitar sem framkvæmd var 27. mars.

Þá er því m.a. haldið fram að heimildarmaður Ríkisútvarpsins hafi dregið ásakanir um undirverðlagningu til baka þremur vikum fyrir húsleit og sýningu þáttar Kastljóss um málið. Þrátt fyrir það hafi fullyrðingar um undirverðlagningu verið haldið fram í þættinum.

Þá segir að það liggi fyrir að Ingibjörg hafi undirritað beiðni um húsleit hjá Samherja og síðar kærur á hendur Samherja. Er því haldið fram að það hafi verið gert þó „tilteknum einstaklingum, var kunnugt um að ásakanir á hendur fyrirtækinu byggðust á rangfærslum,“ segir á heimasíðu fyrirtæksins.

Samherji var sýknaður af ásökunum um undirverðlagningu.

Telur samskipti óeðlileg 

„Þessir tölvupóstar staðfesta það sem okkur hefur lengi grunað og höfum sagt áður. Þáverandi stjórnendur Seðlabankans héldu frá okkur gögnum og töldu það ekki eftir sér að fara vísvitandi með rangt mál fyrir dómstólum. Við birtum þessa tölvupósta núna svo fólk geti séð svart á hvítu að samskipti Ríkisútvarpsins og Seðlabankans í aðdraganda húsleitarinnar voru mjög óeðlileg. Þessar stofnanir höfðu samantekin ráð um árás á Samherja á grundvelli ásakana sem starfsfólk þessara stofnana vissi að enginn fótur var fyrir, sem er auðvitað grafalvarlegt,“ er haft eftir Þorsteini Má Baldvinssyni, forstjóra Samherja á heimasíðu fyrirtækisins.

Tengdar fréttir

Samherji

Söfnuðu mottum og hálfri milljón

• Fengu allir sokka í tilefni mottumars
• Kaldbakur fékk yfirhalningu á Akureyri
• SKE rannsakar Samherja og Síldarvinnsluna
• Miklar breytingar gerðar í brú Margrétar

» Fleiri tengdar fréttir

• 1 blogg um fréttina

Bloggað um fréttina

• Páll Vilhjálmsson: Helgi Seljan og linnulausa böggið í Samherjamálinu