Bráðamengun í Reyðarfirði á ábyrgð hafnarinnar

„Enn sem komið er höfum við ekki fengið upplýsingar um hversu mikið af olíu er talið hafa farið í hafið, en um er að ræða dísilolíu,“ segir Ólafur A. Jónsson, sviðsstjóri hjá Umhverfisstofnun, í samtali við 200 mílur spurður hugsanlega mengun vegna fóðurpramma Laxa fiskeldis ehf. sem sökk í Reyðarfjörð í hvassviðri um helgina. Um borð voru um tíu þúsund lítrar af olíu.

Verkefnið nú sé að hreinsa svæðið og koma í veg fyrir frekari mengun, að sögn Ólafs.

Haft var eftir Jens Garðari Helgasyni, framkvæmdastjóra Laxa fiskeldis ehf., í gær að hann teldi ekki miklar líkur á að olía myndi leka út í sjóinn í miklu magni. Taldi hann líklegt að pramminn hefði sokkið vegna oflhleðsu sem afleiðing þess að ís hlóðst á hann í aftakaveðri.

Frétt af mbl.is

Tíu þúsund lítrar af olíu um borð

Hann segir hafnaryfirvöld á Reyðarfirði bera ábyrgð á því að bregðast við mengunarhættu í firðinum. Var þessari tilhögun komið á í nýrri reglugerð sem færði út ábyrgðarsvið hafna þegar bráðamengunartilvik eru annars vegar.

Rætt við fulltrúa hafnarinnar

„Þarna er hætta á bráðamengun og þá virkjast lög um varnir gegn mengun hafs og stranda,“ segir Ólafur. „Þetta svæði skilgreinist sem hluti hafnarsvæðis þrátt fyrir að vera svona utarlega í firðinum,“ útskýrir hann.

Hann segir skýrt að það sé á ábyrgð hafnarinnar að koma í veg fyrir bráðamengun. „Við erum búin að vera í sambandi við fulltrúa hafnarinnar út af þessu máli og höfnin er að fylgjast með því sem er í gangi, en það er tryggingafélag eigenda prammans sem hefur tekið við verkefninu og er að reyna að bjarga verðmætum, bjarga prammanum og koma í veg fyrir mengun.“

Frétt af mbl.is

Fóðurprammi sökk í Reyðarfirði

Varðskipið Þór var til taks þegar pramminn fór að sökkva. Sjósetti áhöfnin léttabát Þórs og hafði öflugar sjódælur meðferðis. Þegar áhöfnin á Þór kom á staðinn var ekkert hægt að gera. Pramminn var þá orðinn fullur af sjó.

Þór hefur yfirgefið svæðið og siglir nú við landið norðanvert.

• Blogga um frétt