Aðeins fuglanet gáfu sig á kvíunum

Verið var að útbúa báta Laxa ehf. með fóðurbyssum í gær og byrjar fóðrun laxa í kvíum á Gripalda-svæðinu í sunnanverðum Reyðarfirði í dag. Lax var síðast fóðraður þar á föstudag, en fóðurpramminn Muninn sökk í illviðri aðfaranótt sunnudags. Fuglanet á kvíum eru löskuð eftir veðrið og verður skipt um þau á næstu dögum þar sem þess er þörf. Kvíarnar sjálfar og nótapokar urðu ekki fyrir tjóni og er búnaðurinn hannaður til að standast álag sem þetta.

Frétt af mbl.is

Engin olía lekið úr prammanum

Jens Garðar Helgason, framkvæmdastjóri Laxa, segir að í gær hafi veður verið stillt í Reyðarfirði og aðstæður góðar fyrir kafara frá Köfunarþjónutsunni. Jens Garðar segir að ákvörðun um björgunaraðgerðir verði teknar þegar mat Köfunarþjónustunnar, tryggingafélags og fleiri liggi fyrir og þá með hvaða hætti og hvenær prammanum verður lyft.

Allar aðgerðir eru í samráði við Fjarðabyggðarhafnir, en svæði innan fjarðar telst vera á hafnarsvæði samkvæmt samþykktum sveitarfélagsins. Jens Garðar segir að ekki hafi orðið vart við olíu í sjónum þar sem pramminn sökk.

Laxar ehf. eru nú með 32 eldiskvíar í Reyðarfirði og eru 16 þeirra við Gripalda, en laxinn þar verður ekki kominn í sláturstærð fyrr en með haustinu.

Slátrun hófst hins vegar í gær á Djúpavogi á laxi úr kvíum út af Bjargi í norðanverðum firðinum eins og áætlanir gerðu ráð fyrir. Flutti brunnbátur um 120 tonn af fiski úr Reyðarfirði til Djúpavogs.