Í tilefni af hrognavertíðinni vill Matvælastofnun (MAST) minna á að ekki sé heimilt að selja hrogn sem þorskhrogn nema um hrogn úr þorski sé að ræða. Engin dæmi eru þó um að slík vörusvik hafi nokkurn tíma átt sér stað.
„Halda skal mismunandi tegundum aðskildum ef selja á hrogn undir fisktegundaheiti. Ef hrogn eru seld sem þorskhrogn (Gadus morhua) eiga það að vera hrogn úr þorski. Ef tegundum er blandað saman skal merkja þau sem blönduð hrogn og tilgreina tegundir. Annað er blekkjandi fyrir kaupendur,“ segir í færslu á vef MAST.
Ekkert dæmi nýlega eða til lengri tíma
Á grundvelli þessa sendi 200 mílur fyrirspurn til MAST þar sem spurt var hvort hvort tilvik hafa komið upp þar sem ákvæðum laga og reglna sé ekki fylgt, hversu algengt það er og hvort slíkt hafi gerst nýlega. Í svari stofnunarinnar segir: „Það hafa ekki komið upp nein tilvik þar sem þessu er ekki fylgt hvorki nýlega eða til lengri tíma litið. Okkur þótti engu að síður ástæða að árétta þetta.“
Fram kemur í færslunni á vef stofnunarinnar að mikilvægast sé við meðhöndlun hrogna að „rétt sé staðið að meðferð og frágangi við slægingu um borð í skipum eða slægingarstöð. […] Allir aðilar sem koma að meðferð og dreifingu matvæla eru ábyrgir fyrir réttri meðferð sem tryggir öryggi og gæði matvæla.“
Þá er sérstaklega minnt á að helstu ákvæði gildandi reglugerða um veiðar og vinnslu:
- Gera skal að afla eins fljótt og kostur er
- Blóðga skal fisk þegar hann er dreginn um borð og láta blæða í ísbaði (rennandi vatni/sjó)
- Slæging skal fara fram að lokinni blóðgun
- Þá hluta aflans, sem ætlaðir eru til manneldis, skal þvo vandlega og aðskilja frá óætum hlutum
- Kæla skal afurðirnar; fisk, hrogn og lifur, sem næst hitastigi bráðnandi íss með ísun, eða frysta
- Verja skal allar afurðir fyrir veðri og vindum
- Eigi að nýta hrogn og lifur til manneldis skal flokka afurðir eftir fisktegund
Jafnframt þurfi að huga að sérstökum atriðum til að tryggja lifrar og hrogna:
- Vanda slægingu, svo hrogn og lifur séu eins heil og kostur er
- Varast að rjúfa himnuna sem myndar hrognasekkinn og ver hrognin
- Varast að láta meltingarensím s.s. gall leika um afurðirnar
- Nota minni ílát svo komist verði hjá því að hrognasekkurinn gefi sig undan þrýstingi
- Nota krapa til kælingar