Tekið að lægja eftir skítaveður á Vestfjarðamiðum

Það hefur sem betur fer tekið að lægja í dag en leiðindaveður hefur verið á Vestfjarðamiðum að undanförnu. Þá var skítaveður á Víkurálssvæðinu í gær, að sögn Árna Gunnólfssonar skipstjóra á Vigra RE. Haft er eftir hann á vef Brims að leiðindatíð hefur verið frá því að togarinn millilandaði 690 tonnum í Reykjavík 20. janúar.

„Þetta eru mikil viðbrigði því það var einmunablíða fyrstu 17 daga veiðiferðarinnar. Við fórum frá Reykjavík í þennan fyrsta túr ársins þann 2. janúar og byrjuðum veiðar á suðvesturmiðum, á Tánni og Reykjanesgrunni. Þar var fín veiði. Við færðum okkur svo á Vestfjarðamið og fengum góðan afla. M.a. fórum við á Hampiðjutorgið til að reyna við grálúðu en þar var miklu meira af þorski en hentaði okkur,“ segir Árni.

Í skjól við Snæfellsjökul

Bræla var komin á Vestfjarðamiðum eftir millilöndunina í Reykjavík og var því haldið til veiða á suðvesturmið. „Við reyndum fyrir okkur á Reykjanesgrunni en veðrið versnaði þar skömmu síðar og því var um fátt annað að ræða en að skella sér aftur norður á Vestfjarðamið. Við urðum að stoppa í skjóli við Snæfellsjökul til að bíða af okkur versta veðrið á Vestfjarðamiðum og tækifærið var notað til að veiða nokkur tonn af gullkarfa,“ útskýrir Árni.

Sjómenn að störfum um borð í Vigra. Mynd úr safni. mbl.is/Árni Sæberg

Leiðindaveður var á Vestfjarðamiðum í gær að sögn Árna sem bætti við að aflinn væri þó ágætur þegar hægt er að veiða. „Það er búið að vera brjálað veður í lengri tíma á Halanum,“ segir hann en veður er mun betra í dag og spáð góðu á morgun.

„Við munum því halda áfram norður með kantinum og stefnan er sett á að veiða sem mest af ufsa. Við erum nú komnir með um 200 tonn af fiski eftir millilöndunina og höfum einhverja daga til að bæta við aflann. Stefnan er sett á löndun í Reykjavík á þriðjudaginn í næstu viku,“ sagði skipstjórinn.

• Blogga um frétt