Fiskistofa hefur notað dróna eða flygildi við eftirlit með fiskveiðum frá miðjum janúar og hefur með þeim hætti komist upp um þó nokkur brot gegn lögum um stjórn fiskveiða á þessum stutta tíma. Stofnunin gerir ráð fyrir að þessi eftirlitsaðferð verði hluti af reglulegu eftirliti sínu.

Sjö mál eru nú til rannsóknar sem má rekja til eftirlits með þessum nýstárlega hætti. „Væntanlega mun flestum þeirra ljúka með leiðbeiningabréfi. Við reynum að gæta meðalhófs. Þetta er nú nýtt eftirlit og við reynum að benda mönnum á að þetta eftirlit er í gangi og ljúka einhverjum málum með leiðbeiningabréfi sem síðan er fylgt eftir með áminningu,“ segir Elín B. Ragnarsdóttir, sviðsstjóri veiðieftirlits Fiskistofu. „Ef um ítrekuð brot er að ræða gæti niðurstaðan orðið veiðileyfasvipting.“

Öll leyfi sem þetta eftirlit krefst liggja fyrir og hafa eftirlitsmenn stofnunarinnar fengið kennslu og tilsögn í meðferð tækjanna auk þess sem þeir hafa hlotið fræðslu í persónuvernd.

Í umfjöllun um mál þetta í Morgunblaðinu í dag segir Elín þessa tegund eftirlits frábrugðna hefðbundnu myndavélaeftirliti þar sem slíkt fer fram með því að stöðug upptaka er í gangi, en myndavélarnar á drónunum taka ekki upp nokkurn hlut fyrr en eftirlitsmaður verður vitni að broti og setur upptöku af stað. Þá sé geymsla allra gagna háð ströngum reglum.

Tengdar fréttir

Eftirlit með veiðum

Útgerðaraðili sviptur leyfi þrisvar á þremur árum

• Tilkynna drónaeftirlit í mars
• Þrír sviptir leyfi það sem af er ári
• Unnið að aukinni skilvirkni veiðieftirlitsins
• Boðar byltingu í drónaeftirliti Fiskistofu

» Fleiri tengdar fréttir