Óheimilt er að skipta á aflaheimildum í þorski innan krókaaflamarkskerfisins og loðnukvóta samkvæmt reglugerð sem birt var á vef Stjórnartíðinda í gær, en stutt er síðan Fiskistofa samþykkti tilboð þar sem 1.066 tonn af loðnu fengust í skipti fyrir 732 tonn af þorski.

Landssamband smábátaeigenda vakti nýverið athygli á skiptunum og sagði í færslu á vef landssambandsins 16. febrúar merkilegt að hægt væri að færa loðnu á krókaaflamarksbát enda sé honum aðeins heimilt að stunda veiðar með línu og handfærum og því ógerlegt fyrir áhöfn á slíkum báti að veiða loðnu.

Hafa samtökin talið þetta leið til að koma aflaheimildum í þorski úr krókaaflamarkskerfinu. Þá segir að skiptahlutfallið „0,687 sýnir að loðnan er afar dýrmæt um þessar stundir þar sem ígildastuðull hennar var 0,13 á fiskveiðiárinu 2019/2020“.

Loðnukvótinn sem krókaaflamarksbátur fékk var síðan færður á uppsjávarskip. mbl.is/Golli

Vakti Landssambandið einnig athygli á því að veiðigjald fyrir hvert kíló af lönduðum þorski á þessu ári er 16,63 krónur á kíló, en á loðnu var það á síðasta ári 32 aurar. Ekki hefur verið gefið út veiðigjald fyrir loðnu á yfirstandandi vertíð, en ljóst er að það er mikill munur milli álagningar uppsjávarskipa og þeirra sem stunda aðrar veiðar.

Á borð ráðherra

Landssamband smábátaeigenda kveðst hafa gert athugasemd við að Fiskistofa hafi samþykkt tilboðið um skiptin. „Fiskistofa túlkaði tilboðið þannig að ekki væri ákvæði í reglugerð sem bannaði að því yrði tekið né að loðnan væri flutt yfir á krókaaflamarksbátinn. Að lokinni þeirri færslu var loðnan flutt yfir á uppsjávarskip.“

Jafnframt segist sambandið hafa komið athugasemdum sínum til Kristjáns Þórs Júlíussonar, sjávarútvegs- og landbúnaðarráðherra, á málinu og hefur ráðherra nú undirritað reglugerð sem tekur fyrir skipti af þessum toga. Telja smábátaeigendur ráðherra hafa „komið í veg fyrir að framhald verði á slíku útstreymi þorsks úr krókaaflamarkskerfinu.“

Kristján Þór Júlíusson, sjávarútvegs- og landbúnaðarráðherra. Ljósmynd/Atvinnuvegaráðuneytið

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir

• Blogga um frétt