Patrekur aflamestur í febrúar

Ekki verður annað séð en að Patrekur BA 64 frá Patreksfirði, sem Oddi hf. gerir út, hafi átt góðan mánuð í febrúar er hann náði 267,6 tonna afla í átta róðrum og varð þannig aflamesti línubáturinn í febrúar. Aflabrögðin voru með eindæmum og var mesti afli í stökum róðri þegar áhöfnin á Patreki nældi sér í 39,1 tonn.

Samkvæmt lista Aflafrétta sem unninn er úr gögnum Fiskistofu náðu Vestfirðingar einnig öðru sæti og náði Indriði Kristins BA 751 235,4 tonnum í 14 róðrum. Mesti afli Indriða Kristins í einum róðri 25,1 tonn.

Það var síðan Sandfell SU 75 sem var með þriðja mesta afla meðal línubáta í febrúar og nam hann 208 tonnum í 22 róðrum. Einar Guðnason ÍS 3030 var síðan með 203,6 tonn í 19 róðrum og svo Hafrafell SU 65 með 203,2 tonn í 21 róðri, en bátarnir Haffell og Sandfell eru báðir gerðir út af Loðnuvinnslunni.

Jónína Brynja ÍS 55, krókaaflamarksbátur Jakobs Valgeirs ehf., kom til hafnar með 200,3 tonn í febrúar í 20 róðrum og varð þar með sjötti aflamesti línubáturinn í mánuðinum. Aðrir bátar voru með minna en 200 tonn.

• Blogga um frétt