Komið er að tímamótum á loðnuvertíðinni og er loðnufrystingu nú víðast hvar lokið. Næsta skref er að hefja hrognatöku, en megnið af loðnunni sem íslensku skipin veiða mun fara í hrognatöku þar sem hrognin eru líklega verðmætasti hluti tegundarinnar.

„Frystingu á kvenloðnu er lokið. Við vorum að klára það núna um helgina og nú erum við að búa okkur undir það að taka það sem eftir er í hrogn,“ segir Friðrik Mar Guðmundsson, framkvæmdastjóri Loðnuvinnslunnar hf. á Fáskrúðsfirði.

Íslensku skipin hafa landað rúmlega 23 þúsund tonnum af loðnu á yfirstandandi vertíð og segir Friðrik allt benda til þess að þeim 46 þúsund tonnum, sem eftir eru af 70 þúsund tonna aflamarki íslenskra skipa í loðnu, verði ráðstafað í hrognatöku eða tæpum 66 prósentum af aflanum.

Friðrik Mar Guðmundsson, framkvæmdastjóri Loðnuvinnslunnar. Ljósmynd/Aðsend

Allt í vinnslu

Friðrik viðurkennir að loðnuvertíðin sé heldur stutt að þessu sinni enda ekki um mikinn kvóta að ræða. „Þetta er ekkert magn. Hér áður vorum við að taka um eina milljón tonna og algengt að þetta væri 700 þúsund tonn. Þetta er bara í tvo innkaupapoka núna,“ segir hann.

Mikil spurn er nú eftir loðnuafurðum og vegna þessa fer allur fiskur sem veiðist í vinnslu. „Þegar er svona lítið magn fer ekkert í bræðslu,“ útskýrir Friðrik og bætir við að sá fiskur sem fer í hrognatöku fari í kjölfarið í bræðslu, en þá hefur verðmætasti hlutinn verið tekinn úr fiskinum.

Loðnuvinnslan hefur tekið við tæplega 4 þúsund tonna afla til vinnslu úr 12 norskum skipum og um 500 tonnum úr Hoffelli, þeirra eigin skipi, að sögn Friðriks. Hann segir norsku skipin skila mikilvægri viðbót, en skip Loðnuvinnslunnar veiða aðeins um 2.500 tonn samkvæmt úthlutun aflamarks.

Frétt af mbl.is

Loðnufrystingu lokið í Neskaupstað

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir

• Blogga um frétt