Venus NS kom til Akraness laust fyrir miðnætti í fyrrakvöld með 520 tonn af loðnu sem fékkst í Breiðafirði, norðan Grundarfjarðar. Bergur Einarsson skipstjóri segir að fyrirtaksloðna, sem henti til hrognavinnslu, hafi fengist í tveimur köstum. Uppsjávarskipin voru ýmist á Breiðafirði eða Faxaflóa í gær.

„Þetta var fínt til að koma vinnslunni á Skaganum af stað og athuga hrognaþroskann, þetta lítur allt vel út,“ segir Bergur á Venusi. Vinnslan gekk vel hjá Brimi á Akranesi í fyrrinótt og fólk var fljótt að venjast handtökunum þótt engin hafi verið loðnuvertíðin tvö síðustu ár.

Venus hélt á ný á miðin í gærmorgun og náði góðu kasti um miðjan dag á miðjum Faxaflóa. Þar kastaði Beitir NK þrívegis í gær og fleiri skip voru komin á svæðið.

Bergur segir að fyrir helgi hafi sést talsvert af loðnu á Breiðafirði.

Eftir brælu helgarinnar hafi minna sést þar, loðnan hafi látið hafa fyrir sér og erfitt sé að leita á þessum slóðum. Þá sagði Bergur að talsvert væri af loðnu fyrir sunnan Reykjanes, en hrognaþroskinn þar er kominn skemmra á veg.

Nú er öll áherslan lögð á hrognavinnsluna, sem gefur mest verðmæti. Eftir er að veiða um 45 þúsund tonn af tæplega 70 þúsund tonna kvóta íslenskra skipa.

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir