Sigurður Guðjónsson, forstjóri Hafrannsóknastofnunar, mun láta af embætti fyrsta apríl þar sem Kristján Þór Júlíusson, landbúnaðar- og sjávarútvegsráðherra, hefur skipað Þorstein Sigurðsson í embættið til næstu fimm ára. Sigurður, sem hefur gegnt stöðu forstjóra undanfarin fimm ár, sóttist eftir því að halda áfram.

Frétt af mbl.is

„Ég get alveg hugsað mér að stýra þessu fleyi áfram“

Starfið var auglýst og skiluðu sex inn umsókn áður en frestur rann út 19. janúar. Skipuð var nefnd til að meta hæfni umsækjenda og að þeirri vinnu lokinni boðaði ráðherra þá þrjá sem metnir voru hæfastir í viðtal.

„Var það mat ráðherra, að Þorsteinn væri hæfastur umsækjenda til að stýra Hafrannsóknastofnun til næstu fimm ára,“ segir í tilkynningu á vef stjórnarráðsins.

Þorsteinn Sigurðsson. Ljósmynd/Stjórnarráðið

Fram kemur í tilkynningunni að Þorsteinn sé með BS-gráðu í líffræði frá Háskóla Íslands og Cand. Scient-gráðu frá Háskólanum í Bergen. Hann hóf störf sem sérfræðingur hjá Hafrannsóknastofnun árið 1994. Árin 2005 til 2016 starfaði hann sem forstöðumaður nytjastofnasviðs og frá árinu 2016 til 2019 var hann forstöðumaður sviðs uppsjávarlífríkis. Árið 2020 hóf hann störf sem sérfræðingur á skrifstofu sjávarútvegs og fiskeldis í atvinnuvega- og nýsköpunarráðuneytinu.

Umsækjendur í stafrófsröð:

1. Guðmundur J. Óskarsson, sviðsstjóri
2. Guðmundur Þórðarson, sviðsstjóri
3. Marcin Zembroski, sérfræðingur
4. Sigurður Guðjónsson, forstjóri
5. Soffía Guðmundsdóttir, framkvæmdastjóri
6. Þorsteinn Sigurðsson, sérfræðingur

Tengdar fréttir

Hafrannsóknastofnun

„Allir um borð eru afskaplega hjálplegir“

• Samstarfssamningur Hafró og NMSÍ undirritaður
• Telja dílamjóra hrygna í hreiður
• Hafa rýnt í 590 þúsund maga
• Sjósetja nýtt hafrannsóknaskip í dag

» Fleiri tengdar fréttir

• 1 blogg um fréttina

Bloggað um fréttina

• Jóhannes Ragnarsson: Óhæfum forstjóra sópað út