Skipverjarnir heilir heilsu og veirufríir

Allir skipverjarnir í súrálsskipinu sem komu til Reyðarfjarðar 20. mars sl. teljast nú heilir heilsu og veirufríir. Sýni voru tekin af skipverjunum átján. Þetta kemur fram í tilkynningu frá lögreglunni á Austurlandi.

„Gert er ráð fyrir að sá síðasti þeirra, sá er fluttur var á Landspítala fyrir nokkru eftir að honum hafði elnað sóttin, verði útskrifaður í kvöld eða í fyrramálið. Engin smit greindust hjá þeim áhafnarmeðlimum sem ósýktir voru við komu fremur en í fyrri skimunum,“ segir í tilkynningunni.

„Í undirbúningi er hreinsun skipsins sem telst sóttkví þar til henni lýkur. Gangi allt eftir mun henni ljúka fyrir helgi og komi ekkert óvænt upp á verður bæði skip og áhöfn þá hæf til siglingar á ný, að líkindum næstkomandi föstudag.“

• Blogga um frétt