Kaupa og taka við rekstri á Eðalfiski

Brimilshólmi ehf. á Akranesi hefur gengið frá kaupum á öllu hlutafé í Eðalfiski ehf. í Borgarnesi og tekið við rekstri félagsins, að því er fram kemur í fréttatilkynningu.

Eðalfiskur sérhæfir sig í framleiðslu á ferskum, frystum, reyktum og gröfnum laxaafurðum. Félagið skilaði 19 milljóna rekstrartapi á síðasta ári en skilaði 2,4 milljóna hagnaði 2019. Hins vegar voru seldar vörur fyrir 596,9 milljónir í fyrra sem var 7,5 milljónum meira en árið á undan.

Fleiri eigendur eru að Brimilshólma og er stærsti staki hluthafinn Gestur Breiðfjörð Gestsson sem fer með 18,95% í gegnum félag sitt Fiskibein ehf. Þar á eftir fara þau Inga Ósk Jónsdóttir og Gísli Runólfsson með 16,58% hlut hvort í gegnum sameiginlegt félag þeirra Heillastjörnu ehf. Aðrir hluthafar fara með 10% eða minna.

Um er að ræða sama hóp og kom að kaupum á Norðanfiski ehf. á síðasta ári.

Frétt af mbl.is

Brim selur Norðanfisk – Bæjarstjórinn meðal hluthafa

„Á bak við Brimilshólma, sem kaupir Eðalfisk, er öflugur hópur sem er að veðja á framtíðarsýn til sóknar á erlendum markaði og við höfum mikla trú á tækifærum á innanlandsmarkaði. Við sjáum tækifæri hollu mataræði og aukinni fiskneyslu og viljum styðja við viðskiptavini okkar og skapa þeim virði í sinni starfsemi,“ segir Inga Ósk Jónsdóttir í tilkynningunni fyrir hönd Brimilshólma.

„Rekstur Eðalfisks á sér langa og farsæla sögu í Borgarnesi sem við erum stolt af og við fögnum því að kaupendur séu öflugur hópur og höfum við fulla trú að félagið muni halda áfram að vaxa og dafna með nýjum eigendum,“ segir Kristján Rafn Sigurðsson, framkvæmdastjóri og einn núverandi eigenda Eðalfisks.

• Blogga um frétt