Gríðarleg framleiðsluaukning hefur átt sér stað í íslensku fiskeldi á síðustu tíu árum og náði framleiðslan nýju meti í fyrra er hún nam 40.595 tonnum. Er þetta afrakstur mikilla fjárfestinga á síðustu árum og hafa 25 milljarðar farið í uppbyggingu greinarinnar frá 2008 til 2019.

Mest er framleitt af laxi eða 34.341 tonn sem er tæplega 85% af allri eldisframleiðslu á Íslandi. Um er að ræða enn eitt framleiðslumetið í eldislaxi sem fellur og nam aukningin milli áranna 2019 og 2020 alls 7.384 tonnum eða 27,4%. Umsvif greinarinnar vex hratt en í alþjóðlegum samanburði er Ísland enn dvergur. Haldi hins vegar vöxturinn af jafn miklum krafti áfram er vel innan við áratugur í að fiskeldisfyrirtækin hér á landi taki fram úr Færeyingum.

mbl.is

Það er þó á einu sviði sem íslenska eldisgreinin er komin lengra en erlendir keppinautar og það er á sviði bleikjueldis. Ísland framleiðir langmest af bleikju á heimsvísu, en talið er að bleikjueldi fylgi ýmsir kostir fram yfir laxeldið svo sem að vera laus við laxalúsina. Hins vegar hallar nokkuð á bleikjuna þar sem afurðin er ekki jafn þekkt og laxinn og hafa íslensk fyrirtæki lagt mikið í sölurnar til að búa til markað fyrir bleikjuafurðir.

Í apríl sagði Magnús Bjarnason, hjá ráðgjafarfyrirtækinu Mar, í viðtali við Undercurrent News að talið væri að Ísland gæti farið fram úr Skotlandi í framleiðslu eldisafurða. „Þetta er atvinnugrein sem hefur verið byggð úr engu á skömmum tíma og íslenskir fjárfestar telja að þeir hafi misst af tækifærum. [...] Tilfinningin í greininni er að við getum náð 200 þúsund tonnum,“ sagði Magnús.

Þróun undanfarinna ára bendir til þess að sú spá kunni að rætast.

Frétt af mbl.is

Laxeldið nái 200 þúsund tonnum

Tengdar fréttir

Fiskeldi

Fjárfestingin 115 milljarðar króna

• Bátur Arnarlax verður fyrsti sinnar tegundar
• Lagareldismálið fyrst á dagskrá
• Gera niðurstöður umhverfisvaktana aðgengilegar
• Gagnrýna aðferðir við áhættumat

» Fleiri tengdar fréttir