„Menn farnir að láta sig dreyma um makríl“

„Við erum komnir með 750 tonn í fimm holum. Það var mjög lítið að hafa í fyrstu en þetta hefur heldur skánað. Við höfum nú upp á síðkastið verið að fá um 10 tonn á tímann,“  segir Tómas Kárason, skipstjóri á Beiti, í færslu á vef Síldarvinnslunnar. Skipið er nú á kolmunnaveiðum í íslenskri lögsögu og segir Tómas fiskinn hafa verið stóran en að meira mætti vera af honum.

„Hér um borð eru menn farnir að láta sig dreyma um makríl. Færeyingarnir eru byrjaðir að veiða makríl í kantinum austur af Eyjunum. Þeir byrjuðu víst í gær,“ segir Tómas.

Bræludrulla

Hið nýja skip Börkur er einnig á kolmunnaveiðum og segir Hjörvar Hjálmarsson, skipstjóri á Berki, að veðurfarið mætti vera betra. „Við erum á þriðja holi, fengum 320 tonn í fyrradag og 260 í gær. Við drögum í sólarhring. Nú erum við austan við Þórsbankann nálægt miðlínu á milli Færeyja og Íslands ásamt Beiti og hér er bölvuð bræludrulla.

Fyrsta veiðiferð á spánnýju skipi er að sjálfsögðu spennandi og hér um borð eru allir að læra. Það hefur allt gengið vel og einungis örfá smáatriði sem þurft hefur að lagfæra. Það er öllum ljóst að við erum á hörkuskipi sem gefur stórkostlega möguleika. Öll áhöfnin er alsæl og í brælunni núna finna menn hve skipið fer vel með okkur,“ segir Hjörvar.

Börkur kom til landsins um mánaðarmót og er nú í fyrsta túr. Ljósmynd/Kristín Hávarðsdóttir

• Blogga um frétt