Baldvin Njálsson GK-400, fyrrum togari Nesfisks í Garði, hefur verið seldur og afhentur til útgerðar í Rússlandi og liggur í Hafnafjarðarhöfn sem stendur.
Von er á nýjum frystitogara sem mun taka við af gamla Baldvini fyrir áramót. Hann er smíðum í skipasmíðastöðinni í Vigo á Spáni. Upphafleg afhendingaráætlun stendur þrátt fyrir heimsfaraldur Covid-19.
Lá á afhendingu
Spurður út í millibilsástandið sem nú myndast þar til nýr togari verður tekið í gagnið segir Bergþór Baldvinsson, framkvæmdastjóri Nesfisks að legið hafi á afhendingu gamla togarans.
„Við nýtum mannskapinn í á meðan á önnur skip hjá okkur, svo koma sumarfrí og annað inn í þetta,“ segir Bergþór.
Gamli Baldvin mun bráðum sigla um Japanshaf.
mbl.is/Unnur Karen
Nesfiskur hefur aldrei áður keypt nýsmíði á borð við nýjan Baldvin. Það er óhætt að fullyrða fjárfestingin sé stór fyrir félagið. Spurður hvort að sjómönnum í áhöfn fækki með komu nýs togara segir Bergþór ekkert fyrirséð með það.
„Auðvitað hefur þessi skerðing [á aflamarki] á öll plön en við erum ekki komin svo langt,“ segir Berþgór.
Mun sigla um Japanshaf
Rússneska útgerðafélagið Aquarius Co., ltd. keypti gamla Baldvin. Það er með heimilisfesti í Khabarovsk en togarinn kemur til með að verða gerður út frá hafnarborginni Nakhodka skömmu frá Vladivostak í Suðaustur-Rússlandi ekki langt frá landamærum Rússlands og Norður-Kóreu.
Að sögn Friðriks Jóns Arngrímssonar sem annaðist sölu skipsins mun skipið áfram veiða bolfisk en það verður einnig útbúið fyrir rækjuveiðar.
Sjá má staðsetningu Nahhodka merkt með rauðu örinni.
Skjáskot