Allt of langt að fara í Smuguna

Makrílveiðar ganga ágætlega í Síldarsmugunni svonefndu að sögn Grétars Arnar Sigfinnssonar, rekstrarstjóra útgerðar hjá Síldarvinnslunni í Neskaupstað. Ekkert bólar á makríl í íslenskri lögsögu en Hafrannsóknastofnun er um þessar mundir í árlegum leiðangri um Norðurhöf í leit að makríl.

„Við erum komin með fimm skip í þennan hring svo vinnslan helst vel gangandi og er búin að gera það síðan við byrjuðum,“ segir Jón Már.

Samherji tók nýlega Börk II NK á leigu til makrílveiða í Smugunni. Á vegum Síldarvinnslunnar fara meðal annars Beitir NK, Bjarni Ólafsson AK og Börkur NK.

Grétar vonast til þess að makríll komi í leitirnar við Íslandsstrendur: „Þetta er allt of langt að fara og svo er veiðin mjög misjöfn þarna.“

Aðspurður segist Grétar ekkert hafa heyrt af makríl við Íslandsstrendur, hann bindi þó vonir við að eitthvað finnist í leiðangri Hafrannsóknastofnunar svo hægt sé að byrja að veiða í íslenskri lögsögu.

Rannsóknaskipið Árni Friðriksson lagði af stað í rannsóknarleiðangur 5. júlí og siglir við eystri mörk íslenskrar fiskveiðilögsögu. Meðal meginmarkmiða verkefnisins er að meta magn og útbreiðslu makríls, kolmunna og norsk-íslenskrar síldar.