Matthías nýr framkvæmdastjóri Borgarplasts

Matthías Matthíasson hefur verið ráðinn framkvæmdastjóri Borgarplasts. Í tilkynningu segir að með ráðningunni sé stefnt að því að byggja ofan á þær traustu stoðir sem Guðbrandur Sigurðsson, fráfarandi framkvæmdastjóri, hafi lagt grunninn að.

Einnig segir að nýr framkvæmdastjóri muni leggja sérstaka áherslu á sölu og útflutning en Matthías búi yfir mikilli reynslu á því sviði.

Á árunum 2009-2020 starfaði hann sem framkvæmdastjóri flutningasviðs hjá Eimskip. Á árunum 2004-2009 var hann framkvæmdastjóri Komatsu í Danmörku og þar áður starfaði hann sem framkvæmdastjóri Eimskips í Englandi.

Lætur af störfum til að sinna öðrum verkefnum

Fram kemur í tilkynningunni að Guðbrandur hafi leitt fyrirtækið af mikilli festu í gegnum mikla umbreytingu og faraldurinn en hafi nú óskað eftir því að láta af störfum til að sinna öðrum verkefnum.

Borgarplast framleiðir fiskikör og frauðkassa fyrir ferskan fisk, frauðeinangrun og ýmsar fráveitulausnir á borð við brunna, olíuskiljur og rotþrær.

Í Mosfellsbæ rekur Borgarplast hverfisteypu fyrir fiskikör og er stærsti söluaðili einangraðra fiskikara á Íslandi ásamt því að selja fiskikör til allra heimsálfa. Í Reykjanesbæ starfrækir fyrirtækið frauðverksmiðju með umtalsverða framleiðslugetu.

• Blogga um frétt