Gátu talið fleiri seli en síðustu þrjú ár

Alls sáust 718 selir á um 107 kílómetra strandlengju Vatnsness og Heggstaðaness á Norðurlandi vestra, þegar árleg talning fór þar fram á sunnudag.

Frá þessu greinir Selasetur Íslands og þakkar um leið þeim 58 innlendu og erlendu sjálfboðaliðum sem þátt tóku í talningunni í ár.

Meðal annars komu sjálfboðaliðar frá Þýskalandi, Finnlandi, Ísrael, Bandaríkjunum, Englandi, Ítalíu og Frakklandi, auk góðs hóps frá Veraldarvinum.

Markmið talningarinnar er að fylgjast með fjölda og staðsetningu sela á strandlengjunni, að því er segir í tilkynningu.

„Þau ellefu ár sem Selatalningin mikla hefur farið fram hafa sést að meðaltali 757 selir hvert sinn. Árin 2008 og 2009 sáust flestir selir eða yfir 1.000 bæði árin en árið 2012 sáust aðeins 422 selir. Í ár sáust alls 718 selir sem er meira en síðustu þrjú síðustu skipti, en þó minna en árlegt meðaltal gefur til kynna.“

• Blogga um frétt