Kennsla í Fiskeldisskóla unga fólksins fór í fyrsta sinn fram í sumar á Vestfjörðum annars vegar og Austfjörðum hins vegar.
Fiskeldisskólinn sækir í smiðju Sjávarútvegsskóla unga fólksins þar sem ungmenni sækja atvinnutengda fræðslu í samvinnu fiskeldisfyrirtækja, Háskólans á Akureyri og vinnuskóla byggðarlaga.
Vel merktir nemendur.
Ljósmynd/Háskólinn á Akureyri
Fyrir vestan fór kennslan fram í Vesturbyggð og á Djúpavogi fyrir austan. Þrír kennarar kenndu við skólann, ýmist útskrifaðir sjávarútvegsfræðingar eða nemar í sjávarútvegsfræðum við Háskólann á Akureyri.
Nemendur við skólann sumarið 2021 voru 22 samtals, á aldrinum 13-16 ára.
Kerin vöktuð.
Ljósmynd/Háskólinn á Akureyri
Alþjóðlegt samstarf
Kennslufyrirkomulag er þannig að kennt var 4-6 tíma á dag þrjá daga á Djúpavogi og fjóra daga í Vesturbyggð. Nemendur fengu bóklega fræðslu í formi fyrirlestra, fóru í leiki, heimsóttu fyrirtæki í fiskeldi og tengdum greinum og fengu að fara út í kvíar.
Skólinn er hluti af Bridges Erasmus +-verkefni sem Sjávarútvegsmiðstöð Háskólans á Akureyri tekur þátt í.
Fiskurinn tekinn út.
Ljósmynd/Háskólinn á Akureyri
Fyrirhugað er að kynna þennan skóla og fyrirkomulag hans í öðrum þátttökulöndum Bridges Erasmus+-verkefnisins sem fjallar um nám í fiskeldi. Þau eru auk Íslands Noregur, Svíþjóð og Finnland.
Kvíarnar skoðaðar.
Ljósmynd/Háskólinn á Akureyri