Lýsið sækir á í takt við aukna hollustuvitund

Jafnt og þétt styrkir Lýsi stöðu sýna á neytendavörumarkaði víða um heim. Salan í Mexíkó vex hratt en í Bandaríkjunum er samkeppnin mjög hörð.

Kórónuveirufaraldurinn varð til þess að um allan heim vaknaði fólk til vitundar um mikilvægi heilbrigðra lifnaðarhátta og holls mataræðis. Er sennilegt að aldrei fyrr hafi almenningur verið jafn duglegur að lesa greinar um heilsu, bætiefni og næringu, enda kom í ljós nokkuð snemma í faraldrinum að lífsstílstengdir þættir gátu bætt eða minnkað líkur fólks á að þola það að smitast af veirunni.

Árni Geir Jónsson er yfirmaður sölu neytendavöru hjá Lýsi og segir hann fyrirtækið hafa greint töluverða aukningu á sölu lýsis í neytendaumbúðum á öllum helstu markaðssvæðum fyrirtækisins. „Aðeins á Íslandi fundum við fyrir samdrætti í lýssisölunni og skrifast það á mikla fækkun ferðamanna sem oft hafa keypt lýsisperlur eða lýsi í flösku þegar þeir heimsækja landið.“

Hugað að kórónuveirusjúklingi. Sala á lýsi tók kipp í faraldrinum, m.a. vegna umræðu um mikilvægi D-vítamíns og fitusýra AFP

Árni Geir þakkar kröftuga lýsissölu m.a. því að nokkuð snemma í faraldrinum spannst umræða um mikilvægi D-vítamíns fyrir ónæmiskerfi líkamans. „Eins var mikið fjallað um áhrif ómega-3-fitusýra fyrir hin ýmsu kerfi líkamans sem hjálpa fólki að halda góðri heilsu, en ekkert jafnast á við lýsi sem uppspretta hollra fitusýra. Þessar fitusýrur verðum við að fá úr matvælum enda framleiðir líkaminn þær ekki sjálfur.“

Var salan á sumum markaðssvæðum það góð að Lýsi átti fullt í fangi með að tryggja nægt vöruframboð. „En þar spilaði líka inn í að faraldurinn olli víða röskunum á flutningum og flóknara en venjulega að bregðast við breyttri neytendahegðun.“

Frétt af mbl.is

Fitusýrur úr lýsi eyða kórónuveiru

Rússar duglegir að taka lýsið sitt

Í megindráttum má skipta sölustarfsemi Lýsis í tvo hluta: annars vegar er neytendavöruhliðin og hins vegar sala á lýsi í tönkum og tunnum til annarra framleiðenda sem ýmist blanda lýsinu saman við matvæli eða lyf, ellegar pakka í neytendaumbúðir og selja sem fljótandi lýsi eða lýsisperlur. Lýsi hf. flytur afurðir sínar til yfir 70 markaða í öllum heimsálfum nema suðurheimskautinu og til marks um stærð íslenska fyrirtækisins þá er verksmiðja Lýsis sú stærsta sinnar tegundar m.v. framleiðslugetu á náttúrulegum fiskolíum til manneldis. Þá er verksmiðja Lýsis með allar nauðsynlegar vottanir fyrir lyfjaframleiðslu sem gefur fyrirtækinu verulega sérstöðu.

Í seinni tíð hefur Lýsi sótt í sig veðrið á neytendamarkaði og má finna vörur fyrirtækisins í hillum verslana víðs vegar um heiminn. „Rússland er í dag orðið einn okkar stærsti markaður en sem dæmi um þróunina hefur Lýsi t.d. nýlega gert strandhögg í Mexíkó og salan þar tvöfaldast á milli ára tvö ár í röð.“

Frétt af mbl.is

Draga úr smithættu með fitusýrum

Bandaríkjamarkaður er vitaskuld safaríkasti bitinn á lýsismarkaðnum og hefur Lýsi styrkt þar stöðu sína smám saman. Vandinn við Bandaríkin, segir Árni Geir, er að þar er samkeppnin ákaflega hörð og úrvalið svo gott að í stærri verslunum hafa neytendur úr mörgum hillumetrum af fiskolíu að velja. Má m.a. finna vörur Lýsis til sölu hjá verslunum Whole Foods sem hafa sérstöðu fyrir gott framboð af hollri matvöru í hæsta gæðaflokki. „Til að komast enn betur að á þessum markaði þyrfti að ráðast í mikið og kostnaðarsamt markaðsstarf,“ útskýrir Árni og bætir við að margar þær vörur sem Lýsi keppir við vestanhafs séu framleiddar úr hráefni sem Lýsi framleiddi upphaflega.“

Þörungar gætu leikið stærra hlutverk

Ekki ætti að hafa farið fram hjá Íslendingum að mikil vöruþróun hefur átt sér stað hjá Lýsi undanfarna áratugi. Gantast Árni Geir með það að stundum biðji viðskiptavinir um að fá aftur gamla lýsið sem hafði meira afgerandi lýsisbragð en með bættum vinnsluaðferðum er það lýsi sem í dag er selt á flöskum bragðmilt og vitaskuld fáanlegt bragðbætt. Eru vörumerkin um tuttugu talsins, allt frá klassísku kaldhreinsuðu fljótandi lýsi yfir í samsettar pakkningar sem tvinna saman lýsisperlur og hylki með mikilvægum fæðubótarefnum sem styðja við og njóta góðs af virkni lýsisins í líkamanum.“

Aðspurður hvort von sé á fleiri vörutegundum segir Árni að líklega sé vöruþróunarvinnan komin að mörkum þess sem gera má með fiskolíurnar en hins vegar geti spennandi möguleikar verið fólgnir í að nýta hráefni á borð við andoxunarefnið astaxthantín og eins vert að skoða olíuframleiðslu úr hráefni á borð við þörunga. „Við fylgjumst vel með því nýsköpunarstarfi sem á sér stað hér á landi og vinnum jafnframt jöfnum höndum að því með okkar dreifingaraðilum að betrumbæta vörur og umbúðir í takt við ábendingar og óskir neytenda.“

Með því að framleiða olíur úr þörungum sem ræktaðir eru í stýrðu umhverfi mætti leysa ýmis vandamál. Nefnir Árni Geir að framleiðsla á fiskolíum sé háð framboði á góðu hráefni og þar hafi sveiflur í stofnstærðum og aflaheimildum áhrif á verðið. Verðsveiflur geti flækt áætlanagerð enda verði að standa við gerða samninga við kaupendur. Þörungaræktun þýðir hins vegar mun jafnara og fyrirsjánlegra hráefnisframboð.

Fortíðarþrá í kringum fljótandi lýsi

Eflaust eru margir lesendur forvitnir um hvernig salan á neytendavörum Lýsis skiptist á milli fljótandi lýsis og lýsisperla. Það eru jú ekki allir hrifnir af bragðinu af fljótandi lýsi og voru perlurnar einmitt þróaðar til að koma til móts við þann hóp.

Árni Geir segir skiptinguna mjög breytilega eftir löndum. „Í Mexíkó seljum við t.d. aðeins fljótandi lýsi en það skýrist þó aðallega af því að við notum nauta-gelatín í perlurnar okkar og hefur þurft að fara í gegnum tímafrekt ferli með mexíkóskum stjórnvöldum til að flytja þá vöru inn. Á sumum markaðssvæðum verðum við vör við ákveðna fortíðarþrá hjá neytendum sem finnst eitthvað notalegt við það að færa sig úr perlunum og yfir í fljótandi lýsi sem þau kannski minnast frá æskuárunum. Er þetta m.a. raunin í Frakklandi þar sem fljótandi lýsi sækir á á kostnað lýsisperlanna. Í Austur-Evrópu er fljótandi lýsi einnig ráðandi en hins vegar vilja Danir og Finnar frekar perlurnar. Heilt á litið hefur salan á fljótandi lýsi verið að aukast hraðar en salan á perlunum.“