Dæla hausum og hryggjum í 300 metra lögnum
Setja bókamerki
Á hverju ári falla til um 6.500 tonn af fiskhausum og hryggjum í fiskvinnslu Samherja á Dalvík. Í áraraðir hefur þessu verið ekið á milli húsa og komið í þurrkun, en sá tími er nú liðinn eftir að sett var upp 300 metra lagnkerfi sem dælir hliðarafurðinni milli húsa.
Fram kemur í færslu á vef Samherja að afgangsvatn frá kælikerfi fiskvinnsuhússins er notað við dælinguna og er vatn því margnýtt. Gerðar voru tilraunir með búnaðinn í október og hafa þær gengið vel að sögn Gunnars Aðalbjörnssonar, deildarstjóra þurrkunar.
„Við erum að þurrka á bilinu 140 til 150 tonn á viku, sem þýddi að lyftarar voru að keyra til okkar um eitthundað körum á dag í um tuttugu ferðum. Miðað við fjarlægðina milli húsanna óku lyftararnir daglega um fimmtán kílómetra, þannig að þetta dælukerfi er jákvætt skref í umhverfislegu tilliti, auk þess sem hráefnið er enn ferskara og betra en áður,“ segir Gunnar í færslunni.
„Þetta er algjör bylting, stýringin verður mun auðveldari og hagkvæmari á allan hátt, auk þess sem kolefnissporið minnkar. Við höfum aðeins verið með kerfið í notkun í nokkra daga og þetta lofar afskaplega góðu, engin teljandi vandamál hafa komið upp.“
Hausaþurrkun Samherja á Dalvík notar um 40 tonn af heitu vatni á klukkustund og er stærsti notandinn á heitu vatni í sveitarfélaginu. „Það er ekki bara að við séum að nota afgangsvatn frá kælikerfi fiskvinnslunnar. Heita vatnið sem við tökum inn, fer síðan aftur frá okkur og hitar upp gangstéttar og bílastæði á athafnasvæði Samherja. Allt miðast þetta við að nýta vatnið eins og kostur er,“ segir Gunnar.
Árshátíð ríkislögreglustjóra haldin í Tékklandi
Banna mengandi búnað sem leyfður er á Íslandi
„Á réttri leið en nokkuð í land ennþá“
Shakespeare fannst í skókassa
Vona að Orkustofnun veiti ekki virkjunarleyfi
Handteknir eftir myndatöku í Vesturbæjarlaug
„Hvílir mikil leynd yfir þessu öllu“
„Okkur miðar í rétta átt“